के.के.एम. महाविद्यालयाच्या विद्यार्थ्यांची राज्यस्तरीय विकसित भारत युवा संसद 2026 स्पर्धेसाठी निवड झाली आहे.
परभणी /प्रतिनिधी :- रमेश मुलगीर
मानवत येथील के.के.एम महाविद्यालयाचा वाणिज्य शाखेचा विद्यार्थी महेश लांडगे याची राज्यस्तरीय “विकसित भारत युवा संसद 2026″ स्पर्धेसाठी निवड झाली आहे. ही स्पर्धा वसंतराव नाईक कृषी विद्यापीठ, परभणी येथे आयोजित करण्यात आली होती. या स्पर्धेमध्ये परभणी जिल्ह्यातील विविध महाविद्यालयांमधील विद्यार्थ्यांनी उत्स्फूर्त सहभाग नोंदविला.
या स्पर्धेमध्ये कृषी विद्यापीठ, माहिती तंत्रज्ञान विभाग, लॉ कॉलेज, आर्ट्स, सायन्स, कॉमर्स तसेच इंजिनिअरिंग महाविद्यालयांतील अनेक विद्यार्थ्यांनी आपले विचार मांडत स्पर्धेत सहभाग घेतला. जिल्हास्तरीय विकसित भारत युवा संसद 2026 स्पर्धेत के.के.एम. महाविद्यालयाचा विद्यार्थी महेश लांडगे यांनी उत्कृष्ट वक्तृत्व सादर करत तृतीय क्रमांक पटकावला. या उल्लेखनीय कामगिरीमुळे त्याची राज्यस्तरीय “विकसित भारत युवा संसद 2026” स्पर्धेसाठी निवड झाली असून तो पुढील फेरीत सहभाग घेण्यासाठी सज्ज झाला आहे.
महेश लांडगे यांच्या या यशाबद्दल संस्थेचे अध्यक्ष विजयकुमार कत्रुवार, प्राचार्य डॉ. भास्कर मुंडे, उपप्राचार्य डॉ. के. जी. हुगे, प्राचार्य डॉ. कदम नागनाथ, मूल्यशिक्षण समिती प्रमुख डॉ. पंडित मोर, पर्यवेक्षक प्रा. अनिल कापसे तसेच महाविद्यालयातील इतर प्राध्यापक व संस्थेचे पदाधिकारी यांनी त्यांचे अभिनंदन करून पुढील स्पर्धेसाठी शुभेच्छा दिल्या.
महेश लांडगे यांच्या या यशामुळे के.के.एम. महाविद्यालयाच्या नावलौकिकात भर पडली असून त्यांच्या कामगिरीचा आदर्श इतर विद्यार्थ्यांनीही घ्यावा, असा विश्वास प्राध्यापकांनी व्यक्त केला. विद्यार्थ्यांच्या सर्वांगीण विकासासाठी अशा स्पर्धा अत्यंत महत्त्वाच्या असल्याचेही यावेळी सांगण्यात आले. महेश लांडगे यांना डॉ. पंडित मोरे, डॉ. सत्यनारायण राठी, प्रा. सुनील कुकडे यांनी मार्गदर्शन केले.
राज्यस्तरीय स्पर्धेतही महेश लांडगे यश मिळवून महाविद्यालय आणि जिल्ह्याचे नाव उज्ज्वल करतील, अशी अपेक्षा व्यक्त करण्यात येत आहे.
