ललिता निर्वळ सभापती, सुरज काकडे उपसभापतीपदी बिनविरोध
परभणी /प्रतिनिधी : रमेश मुलगीर
मानवत पंचायत समितीच्या सभापतीपदी राष्ट्रवादी काँग्रेस पक्षाच्या ललिता उद्धवराव निर्वळ यांची तर उपसभापतीपदी सुरज सुंदरराव काकडे यांची सोमवारी (१० मार्च) दुपारी २ वाजता झालेल्या विशेष सभेत निवड करण्यात आली. या निवडीमुळे बराच कालावधीनंतर मानवत पंचायत समितीवर राष्ट्रवादी काँग्रेस पक्षाने एकहाती सत्ता मिळवली आहे. निवडणूक प्रक्रिया पंचायत समितीच्या सभागृहात पार पडली.
सभापतीपदासाठी ललिता उद्धवराव निर्वळ तर उपसभापतीपदासाठी सुरज सुंदरराव काकडे यांचेच उमेदवारी अर्ज दाखल झाले होते. निर्वळ या ताडोळेगाव पंचायत समिती गणातून निवडून आल्या असून काकडे हे पालोडी गणातून निवडून आलेले आहेत. दोघेही एकमेव उमेदवार असल्याने त्यांची निवड निश्चित झाली.
निवड जाहीर होताच राष्ट्रवादी काँग्रेस पक्षाच्या पदाधिकाऱ्यांनी व कार्यकर्त्यांनी नवविनिर्वाचित सभापती व उपसभापतीचे जोरदार स्वागत केले. फटाक्यांच्या आतषबाजीने तहसील परिसर दुमदुमून गेला आणि कार्यकर्त्यांनी आनंदोत्सव साजरा केला.
या प्रसंगी पंचायत समिती सदस्य उद्धवराव हरकाळे, ज्योती लक्ष्मण शिंदे, उर्मिला खांबे, शहाजूर खा पठाण, सरस्वती नाईक, प्रमिला शिवाजी उक्कळकर आदी सदस्य उपस्थित होते. तसेच आमदार राजेश विटेकर, बाजार समितीचे सभापती गंगाधरराव कदम, जिल्हा परिषद सदस्य दत्ताराव जाधव तसेच राष्ट्रवादी काँग्रेस पक्षाचे मुकुंदराव मगर, संतोषराव लाडाणे, गजानन घाटूळ यांनी नवविनिर्वाचित पदाधिकाऱ्यांचे अभिनंदन केले.
यावेळी गोपालराव सुरवसे, अमोल कदम, कुमार गुगाणे, बाबासाहेब अवचार, बाळासाहेब निर्वळ, शिवाजीराव वरखडे, लक्ष्मण शिंदे, विशाल यादव, सचिन पठाडे, माऊली फंड, हनुमान मस्के यांच्यासह अनेक पदाधिकारी व कार्यकर्ते उपस्थित होते. सभेचे पीठासीन अधिकारी म्हणून अरुणा संगोवार यांनी काम पाहिले. त्यांना तहसीलदार पांडुरंग माचेवाड व गटविकास अधिकारी एस. आर. कांबळे यांनी सहकार्य केले.
