आकाश जकाते या तरुणांचा खिद्रापूर तेथे कृष्णा नदीत बुडून मृत्यू………
प्रतिनिधी :-दरिकांत कोळेकर. सारथी महाराष्ट्राचा न्युज.
कुरुंदवाड वृत्तसेवा :- खिद्रापूर ता. शिरोळ येथील कृष्णा नदीत पोहायला गेलेल्या एका तरुणाचा बुडून मृत्यू झाला. आकाश जकाते रा. कुपवाड जिल्हा – सांगली, असे त्याचे नाव आहे. घटनास्थळावरून मिळालेली अधिक माहिती अशी की, सांगली, कुपवाड येथील एमआयडीसीमध्ये एका कंपनीत काम करणारे आकाश जकाते व त्यांचे दोन मित्र मंगळवारी सुट्टी असल्यामुळे नृसिंहवाडी ता. शिरोळ येथे दत्त दर्शन घेण्यासाठी आले.
दर्शन घेऊन पुढे जवळच खिद्रापूर येथील कोपेश्वर दर्शन घेण्यासाठी आले होते. दुपारची वेळ असल्याने उखाडा जाणवत असल्याने जकाते व त्याचे दोन मित्र गौतम मोरे व प्रकाश बोरगावे हे खिद्रापूर येथील कृष्णा नदीत पोहायला गेले होते. पोहून झाल्यानंतर बोरगावे व मोरे हे दोघे काठावर आले,
मात्र आकाश न आल्याने तो बुडालेची त्यांना शंका आली. त्यांनी तातडीने पुन्हा नदीत उड्या घेऊन आकाशला शोधण्याचा प्रयत्न केला. काही वेळानी आकाश पाण्यात त्यांना मिळून आला. त्याला पाण्यातून बाहेर काढले, मात्र त्याचा पाण्यातच मृत्यू झाला होता. या घटनेची माहिती तेथील पोलीस पाटील दिपाली पाटील यांना मिळाल्याने त्यांनी तातडीने घटनास्थळी भेट देऊन पोलीस ठाण्यात माहिती सांगितली.
पोलिसांनी घटनास्थळी धाव घेऊन मृतदेहाचे सरकारी दवाखान्यात शवविच्छेदन करून तो नातेवाईकांच्या ताब्यात दिला.
