वालुज (प्रतिनिधी) : वालुज परिसरातील मनीषा नगर येथे दक्षिणमुखी हनुमान जयंतीनिमित्त सुरू असलेल्या भव्य महासोहळ्याला यावर्षी सामाजिक एकतेची प्रेरणादायी जोड मिळाली आहे. या धार्मिक कार्यक्रमातून सर्वधर्मीय ऐक्याचे सुंदर उदाहरण पाहायला मिळत असून, परिसरात बंधुभावाचे वातावरण निर्माण झाले आहे.
या महासोहळ्यातील महापंगतीचे आयोजन ग्रामपंचायत सदस्य इस्माईल भाई पठाण आणि उपसरपंच योगेश भाऊ आरगडे यांच्या हस्ते करण्यात आले. विशेष म्हणजे, मुस्लिम समाजातील इस्माईल भाई पठाण यांनी हिंदू धार्मिक कार्यक्रमात सहभागी होत अन्नदानाचा उपक्रम राबवून “धर्मापेक्षा मानवता मोठी” हा संदेश प्रत्यक्ष कृतीतून दिला.
या महापंगतीत हजारो भाविकांनी सहभागी होत प्रसादाचा लाभ घेतला. सर्व धर्मीय नागरिकांनी एकत्र बसून भोजन केल्याने सामाजिक सलोखा आणि एकात्मतेची भावना अधिक दृढ झाली. स्वयंसेवकांनी उत्कृष्ट नियोजन करत सर्वांना वेळेवर प्रसादाचे वाटप केले.
दरम्यान, भजन, कीर्तन, हरिपाठ आणि प्रवचन यांसारख्या धार्मिक कार्यक्रमांमुळे संपूर्ण मनीषा नगर परिसर भक्तिमय झाला असून, आकर्षक सजावट आणि रोषणाईमुळे उत्साहात भर पडली आहे.
या कार्यक्रमाचे नियोजन मनीषा नगर कमिटीने शिस्तबद्ध पद्धतीने केले असून पाणी, स्वच्छता, सुरक्षा आणि वाहतूक व्यवस्थेची विशेष काळजी घेण्यात आली आहे.
या उपक्रमातून समाजाला एकतेचा आणि बंधुभावाचा प्रभावी संदेश मिळत असून, मनीषा नगरमधील हा आदर्श उपक्रम इतरांसाठी प्रेरणादायी ठरत आहे.
