🏆
राहुल चव्हाण -प्रतिनिधी
अंजनगाव (बारामती): पुणे येथील फडके हॉलमध्ये पार पडलेल्या ‘सक्षम’ जिल्हास्तरीय प्रदर्शनात सोमेश्वर विद्यालय, अंजनगाव यांनी उल्लेखनीय कामगिरी करत अंतिम फेरीत स्थान पटकावले. पुणे जिल्ह्यातील तब्बल ४८ शाळांमधील तगड्या स्पर्धेतून विद्यालयाने अंतिम दोनमध्ये प्रवेश मिळवून आपल्या गुणवत्तेची ठळक छाप उमटवली.
या यशामध्ये इयत्ता ९ वीच्या कु. अवंती संतोष घोरपडे, कु. सिद्धी हेमंत वेदपाठक, कु. दीक्षा भाऊसो मोरे व कु. श्रद्धा संतोष खरात या विद्यार्थिनींचा मोलाचा वाटा आहे. या सर्वांना श्री. खोरे सर यांचे प्रभावी मार्गदर्शन लाभले.
स्पर्धेत उत्कृष्ट कामगिरीबद्दल विद्यालयाला ₹२,५००/- रोख पारितोषिक, आकर्षक सन्मानचिन्ह (ट्रॉफी) व सन्मानपत्र प्रदान करण्यात आले. तसेच सहभागी विद्यार्थिनी व मार्गदर्शक शिक्षकांना विशेष प्रमाणपत्र देऊन गौरविण्यात आले.
या सोहळ्यास मा. श्री. दत्तात्रय थिटे (SCERT), डॉ. प्रभाकर क्षीरसागर (DIET, पुणे), श्री. वाळके (SCERT), सौ. कुमावत (माध्यमिक शिक्षण विभाग) व श्री. सातपुते यांच्यासह सक्षम फाउंडेशनचे समन्वयक श्री. अक्षय राऊत, वर्षा डांगे व अवनी मॅडम उपस्थित होते.
विद्यार्थिनींनी ‘नारळ : एक वरदान’ या विषयावर सादर केलेला व्यावसायिक प्रकल्प परीक्षकांचे विशेष लक्ष वेधून घेतला. हा प्रकल्प केवळ शैक्षणिक न राहता उद्योजकतेकडे वाटचाल करणारा प्रेरणादायी उपक्रम ठरला.
या यशाबद्दल विजेत्या विद्यार्थिनी, मार्गदर्शक शिक्षक व विद्यालयाचे सर्व स्तरांतून अभिनंदन होत आहे. अशीच प्रगतीची वाटचाल भविष्यातही सुरू राहो, अशा शुभेच्छा व्यक्त होत आहेत.
