अहिल्यानगरचे खासदार नीलेश लंके यांची सर्वात मोठी ओळख म्हणजे त्यांनी करोना काळात केलेले आरोग्य सेवेचे काम. त्यावेळी ते आमदार होते. पारनेर तालुक्यातील त्यांनी मोठे कोविड सेंटर उभारले होते. हजारो रुग्णांवर तेथे उपचार झाले. लंके तेथेच मुक्काम करीत. प्रत्येक रुग्णाची चौकशी करीत, धीर देत, योग्य उपचार होतील यावर लक्ष ठेवत. तोंडावर साधा मास्क लावून ते बिनधास्त रुग्णाजवळ जात. संसर्ग होऊ नये म्हणून काळजी घ्या, असे डॉक्टरांनी सांगूनही त्यांनी कधी ऐकले नाही. मला काही होणार नाही, असे ते म्हणत. आणि झालेही तसेच. कोविड गेला, रुग्ण बरे झाले, कित्येकांना प्राण गमवावे लागले पण सुदैवाने लंके यांना काहीही झाले नाही. करोनाचा व्हायरस पचविणारे स्ट्रॉंग मॅन म्हणून ते समोर आले. पुढे ते खासदार झाले.
अलीकडेच ते तापाने फणफणले आहेत. सोबत थकवा आहे. नगरला उपचार झाले नाहीत म्हणून त्यांना पुण्याला हलविण्यात आले. असा हा करोना योद्धा, स्ट्रॉंगमॅन असा अचानक आजारी कसा पडला? नेमकं काय झाले आहे? असा प्रश्न सर्वांनाच पडला आहे. या पार्शवभूमीवर त्यांचा वैद्यकीय अहवाल समोर आला आहे.
वैद्यकीय अहवाल आणि सद्यस्थिती
निदान:
डॉक्टरांनी दिलेल्या माहितीनुसार, खासदार निलेश लंके यांना विषाणूजन्य ताप (Viral Fever) आणि डिहायड्रेशन (Dehydration) चा त्रास होत आहे.
प्रकृती:
सध्या त्यांची प्रकृती स्थिर असून त्यांना डॉक्टरांच्या देखरेखीखाली निरीक्षणाखाली (Observation) ठेवण्यात आले आहे.
उपचार:
रुबी हॉल क्लिनिकमधील आयसीयू (ICU) संचालक डॉ. प्राची साठे यांच्या मार्गदर्शनाखाली त्यांच्यावर उपचार सुरू आहेत. त्यांना विश्रांतीचा सल्ला देण्यात आला आहे.
