१२ प्रकरणे सामोपचाराने निकाली; ₹ १७.६३ लाखांची तडजोड
भडगाव | प्रतिनिधी
विधी सेवा समिती, भडगाव व तालुका वकील संघ, भडगाव यांच्या संयुक्त विद्यमाने भडगाव येथील न्यायालय परिसरात शनिवार, दि. ०९ मे २०२६ रोजी राष्ट्रीय लोकन्यायालयाचे यशस्वीरित्या आयोजन करण्यात आले. या लोकन्यायालयामध्ये न्यायालयीन प्रलंबित तसेच वादपूर्व (Pre-Litigation) स्वरूपाच्या विविध प्रकरणांचा समावेश करण्यात येऊन संबंधित पक्षकारांमध्ये सामोपचाराने तडजोड घडवून आणण्यात आली.
सदर राष्ट्रीय लोकन्यायालयामध्ये एकूण १२ प्रकरणे सामुच्चाराने निकाली काढण्यात आली असून संबंधित पक्षकारांमध्ये परस्पर समेट व तडजोडीच्या माध्यमातून *एकूण रुपये १७ लाख ६३ हजार ५२८ इतक्या रकमेची तडजोड करण्यात आल्याची माहिती उपलब्ध झाली आहे. न्यायालयीन वाद त्वरित, कमी खर्चात आणि सौहार्दपूर्ण वातावरणात निकाली काढण्याच्या उद्देशाने आयोजित करण्यात आलेल्या या उपक्रमास पक्षकारांचा सकारात्मक प्रतिसाद लाभला.
राष्ट्रीय लोकन्यायालयाचे संपूर्ण कामकाज भडगाव न्यायालयाच्या न्यायाधीश श्रीमती प्रावी राजळे मॅडम यांच्या मार्गदर्शनाखाली सुरळीतपणे पार पडले. त्यांच्या मार्गदर्शनामुळे पक्षकारांमध्ये सामंजस्य निर्माण होऊन अनेक वाद न्यायालयीन दीर्घ प्रक्रियेविना निकाली काढणे शक्य झाल्याचे सांगण्यात आले.
तसेच, या लोकन्यायालयामध्ये पॅनल ॲडव्होकेट समाधान सोनवणे यांनी समन्वयाची भूमिका बजावत कामकाज प्रभावीपणे हाताळले. संबंधित पक्षकारांना कायदेशीर मार्गदर्शन करून सामोपचाराने तोडगा काढण्यासाठी त्यांनी महत्त्वपूर्ण योगदान दिले.
राष्ट्रीय लोकन्यायालय यशस्वीपणे पार पाडण्यासाठी तालुका वकील संघ, भडगावचे अध्यक्ष ॲड. बी. आर. पाटील, उपाध्यक्ष ॲड. गणेश वेलसे, सचिव ॲड. प्रकाश सोनवणे यांच्यासह सर्व विधिज्ञांनी सक्रिय सहकार्य केले. तसेच विधी सेवा समिती, भडगाव येथील न्यायालयीन कर्मचारी वर्गानेही अथक परिश्रम घेत आयोजन यशस्वी करण्यासाठी महत्त्वाची भूमिका बजावली.
राष्ट्रीय लोकन्यायालयाच्या माध्यमातून वादग्रस्त प्रकरणे सामोपचाराने निकाली काढण्यास प्राधान्य दिले जात असून, सर्वसामान्य नागरिकांना जलद व सुलभ न्याय मिळवून देण्यासाठी ही संकल्पना प्रभावी ठरत असल्याचे यानिमित्ताने अधोरेखित झाले.
