शनिमांडळ : श्री शनिदेव जयंती व शनी अमावस्या निमित्त शनिमांडळ येथील श्री शनिमहाराज मंदिरात भाविकांची मोठ्या प्रमाणात गर्दी झाली होती. पहाटेपासूनच दर्शनासाठी भक्तांनी लांबच लांब रांगा लावल्या होत्या. संपूर्ण परिसर भक्तिमय वातावरणाने भारावून गेला होता.
महाराष्ट्रातील विविध भागांतून हजारो भाविक शनिमांडळ येथे दाखल झाले होते. अनेक भक्तांनी कुटुंबासह दर्शन घेत श्री शनिदेवांच्या चरणी प्रार्थना अर्पण केली. यावेळी श्री शनिमहाराजांना तेल अभिषेक, पुष्पहार अर्पण तसेच विशेष पूजा-अर्चा करण्यात आली. मंदिर परिसरात भजन, कीर्तन व विविध धार्मिक कार्यक्रमांचे आयोजन करण्यात आले होते.
भाविकांच्या सोयीसाठी स्वयंसेवकांकडून चहा, मराठी शाळेत भोजन तसेच महाप्रसादाची व्यवस्था करण्यात आली होती. याशिवाय पिण्याचे पाणी, दर्शन रांग व्यवस्थापन आदी सुविधा उपलब्ध करून देण्यात आल्या होत्या.
वाहतूक नियंत्रणासाठी पोलीस प्रशासन तसेच स्थानिक युवकांनी विशेष सहकार्य केले. मोठी गर्दी असूनही संपूर्ण कार्यक्रम शांततेत आणि उत्साहपूर्ण वातावरणात पार पडला.
व्यापाऱ्यांतही उत्साह
शनी अमावस्येनिमित्त परिसरातील व्यापारी आणि लहान व्यावसायिकांमध्येही उत्साहाचे वातावरण पाहायला मिळाले. दिवसभर दर्शनासाठी भाविकांची सतत वर्दळ सुरू असल्याने बाजारपेठेतही चैतन्य निर्माण झाले होते.
स्थानिक ग्रामस्थ व मंदिर समितीच्या वतीने सर्व भाविकांचे स्वागत करण्यात आले.
