देशभरात खळबळ उडवून देणाऱ्या NEET परीक्षा पेपरफुटी प्रकरणात केंद्रीय अन्वेषण विभागाने (CBI) मोठी कारवाई करत संशयित शिवराज मोटेगावकर याला ताब्यात घेतले आहे. त्याला आज विशेष न्यायालयात हजर करण्यात येणार असल्याची माहिती समोर आली आहे.
लाखो विद्यार्थ्यांच्या भवितव्याशी संबंधित असलेल्या या गंभीर प्रकरणाचा तपास सीबीआयकडून वेगाने सुरू असून, पेपरफुटी रॅकेटमधील मुख्य सूत्रधारांपर्यंत पोहोचण्यासाठी तपास यंत्रणा विविध धागेदोरे तपासत आहे. लातूर कनेक्शनच्या चौकशीदरम्यान शिवराज मोटेगावकर याचे नाव समोर आल्याने त्याची कसून चौकशी करण्यात येत आहे.
या कारवाईनंतर प्रकरणातील आणखी काही महत्त्वाचे खुलासे होण्याची शक्यता व्यक्त केली जात आहे. सीबीआयकडून इलेक्ट्रॉनिक पुरावे, आर्थिक व्यवहार तसेच संबंधित व्यक्तींचे संपर्क तपासले जात असून, संपूर्ण रॅकेट उघड करण्यासाठी तपासाची व्याप्ती वाढवण्यात आली आहे.
दरम्यान, या पेपरफुटी प्रकरणामुळे विद्यार्थ्यांमध्ये आणि पालकांमध्ये संतापाचे वातावरण निर्माण झाले आहे. प्रामाणिक विद्यार्थ्यांच्या मेहनतीवर पाणी फेरणाऱ्या दोषींवर कठोर कारवाई करावी, अशी मागणी सर्व स्तरांतून होत आहे.
