शिरूर प्रतिनिधी
केंदूर (ता. शिरूर) येथील सामाजिक कार्यकर्त्या सुवर्णाताई विश्वास साकोरे यांना नुकताच राज्यस्तरीय “समाज उत्कर्ष 2026” पुरस्काराने सन्मानित करण्यात आले. उद्योग उत्कर्ष सामाजिक संस्था, ता. वाई, जि. सातारा यांच्या वतीने हा पुरस्कार प्रदान करण्यात आला. संस्थेच्या सचिव मनीषाताई घागरे यांच्या शुभहस्ते त्यांचा गौरव करण्यात आला.
संत कान्हुराज महाराज यांच्या पावन भूमीला वंदन करून समाजकार्याची सुरुवात करणाऱ्या सुवर्णाताई साकोरे या महिला सक्षमीकरणाच्या क्षेत्रातील प्रेरणादायी व्यक्तिमत्त्व म्हणून ओळखल्या जात आहेत.
सन 2019 मध्ये त्यांनी कम्युनिटी रिसर्च पर्सन (CRP) म्हणून कार्यास सुरुवात केली. त्यांच्या सातत्यपूर्ण परिश्रम आणि जिद्दीच्या जोरावर आज त्या डिस्ट्रिक्ट रिसर्च पर्सन (DRP) म्हणून कार्यरत आहेत. सुरुवातीच्या काळात शासकीय योजनांअंतर्गत महिलांचे बचत गट स्थापन करताना त्यांना अनेक अडचणी आणि विरोधाचा सामना करावा लागला. मात्र त्यांनी हार न मानता महिलांना संघटित केले आणि विविध बचत गटांना सुमारे दीड कोटी रुपयांचे बँक कर्ज उपलब्ध करून देण्यात महत्त्वाची भूमिका बजावली.
महिलांच्या आर्थिक उन्नतीबरोबरच त्यांनी सामाजिक आणि कृषी क्षेत्रातही उल्लेखनीय कार्य केले आहे. यशोदा संस्थेच्या माध्यमातून ओढ्यांचे खोलीकरण व रुंदीकरण, तसेच IAHV संस्थेमार्फत ग्रामीण नागरिकांना डिजिटल मोबाईल प्रशिक्षण देण्याचे काम त्यांनी केले.
याशिवाय वॉटर फॉल पीपल संस्थेच्या सहकार्याने शेतकरी महिलांना ठिबक सिंचन, स्प्रिंकलर आणि कांदा कटिंग मशीन यांसारखी कृषी अवजारे उपलब्ध करून दिली. तर रोटरी क्लब च्या माध्यमातून शिलाई मशीनचे वाटप करून अनेक महिलांना स्वावलंबी बनविण्याचे कार्यही त्यांनी केले आहे.
त्यांच्या या उल्लेखनीय सामाजिक योगदानाबद्दल विविध स्तरांतून त्यांचे अभिनंदन करण्यात येत आहे.
