भुदरगड | प्रतिनिधी :
ग्रामीण भागातील नागरिकांना दर्जेदार आरोग्यसेवा गावपातळीवर उपलब्ध व्हावी या उद्देशाने भुदरगड तालुक्यातील कडगाव प्राथमिक आरोग्य केंद्रात शस्त्रक्रिया सुविधेचा शुभारंभ करण्यात आला आहे. महात्मा फुले जनआरोग्य योजनेअंतर्गत आता या आरोग्य केंद्रात छोट्या-मोठ्या शस्त्रक्रिया करण्याची सुविधा उपलब्ध झाल्याने ग्रामीण भागातील रुग्णांना मोठा दिलासा मिळाला आहे.
शस्त्रक्रियेसाठी शहरांमध्ये जावे लागणे, खर्चाचा बोजा आणि वेळेची अडचण यामुळे अनेक गरीब रुग्ण उपचारांपासून वंचित राहत होते. मात्र, आता प्राथमिक आरोग्य केंद्रातच उपचार उपलब्ध होत असल्याने रुग्णांची गैरसोय कमी होणार आहे.
प्राथमिक आरोग्य केंद्र स्तरावर सुरू झालेला हा उपक्रम प्रायोगिक तत्त्वावर राबविण्यात येत असून, तो यशस्वी ठरल्यास राज्यभर विस्तार करण्याचा सार्वजनिक आरोग्य विभागाचा मानस आहे. ग्रामीण भागातील शेवटच्या घटकापर्यंत आरोग्यसेवा पोहोचवण्याच्या दृष्टीने हे महत्त्वपूर्ण पाऊल मानले जात आहे.
यावेळी मान्यवरांनी शस्त्रक्रिया झालेल्या रुग्णांची भेट घेऊन प्रकृतीची विचारपूस केली. वेळेवर मिळणारी आरोग्यसेवा आणि माणुसकीचा आधार रुग्णांसाठी किती महत्त्वाचा असतो, याची जाणीव उपस्थितांना झाली.
कार्यक्रमाला उपस्थित मान्यवर
या पाहणी दौऱ्यात सभापती सारिका नांदेकर, माजी सभापती बाबा नांदेकर, कीर्तीताई देसाई, संदीप वरंडेकर, मानसिंग पाटील यांच्यासह आरोग्य विभागातील अधिकारी आणि स्थानिक नागरिक मोठ्या संख्येने उपस्थित होते.
वैद्यकीय अधिकाऱ्यांमध्ये डॉ. देशमुख, डॉ. सुनील अभिवंत, डॉ. आनंद वर्धन, डॉ. पल्लवी तरळकर, डॉ. रोहिणी पोवार, डॉ. शैलजा पाटील, डॉ. अमोल पाटील आदींचा समावेश होता. तसेच विविध मान्यवर, ग्रामस्थ आणि स्थानिक नागरिकांनीही कार्यक्रमाला उपस्थिती लावली.
