साक्री प्रतिनिधी
साक्री तालुक्यात पेट्रोल आणि डिझेलच्या तुटवड्याची झळ नागरिकांना मोठ्या प्रमाणात बसत असून, विविध पेट्रोल पंपांवर वाहनांच्या लांबलचक रांगा लागल्याचे चित्र पाहायला मिळत आहे. इंधन मिळवण्यासाठी वाहनधारकांना तासन्तास प्रतीक्षा करावी लागत असून, परिस्थिती दिवसेंदिवस गंभीर बनत चालली आहे.
सद्यस्थितीत अनेक पेट्रोल पंपांवर मोठ्या प्रमाणात गर्दी होत असल्याने नागरिकांमध्ये अस्वस्थता निर्माण झाली आहे. रांगेत नंबर लावण्यावरून वाहनधारकांमध्ये शाब्दिक वाद होत असल्याचेही प्रकार समोर येत आहेत. त्यामुळे कुठलाही अनुचित प्रकार घडण्याची शक्यता नाकारता येत नसल्याची भीती व्यक्त केली जात आहे.
विशेष म्हणजे, एवढी गंभीर परिस्थिती निर्माण होऊनही शासन आणि प्रशासनाकडून कोणत्याही ठोस उपाययोजना किंवा पोलिस बंदोबस्ताची व्यवस्था करण्यात आलेली नसल्याची नाराजी नागरिकांमधून व्यक्त होत आहे. गर्दी नियंत्रणासाठी प्रशासनाने तातडीने उपाययोजना कराव्यात, अशी मागणी वाहनधारक आणि शेतकरी वर्गाकडून केली जात आहे.
दरम्यान, इंधनटंचाईमुळे शेतीची कामे, वाहतूक आणि दैनंदिन व्यवहारांवर परिणाम होत असून सर्वसामान्य नागरिक मोठ्या अडचणीत सापडले आहेत.
