दोंडाईचा | प्रतिनिधी :
दोंडाईचा शहरातील पेट्रोल पंपांवर सध्या डिझेल आणि पेट्रोल भरण्यासाठी नागरिकांची प्रचंड गर्दी होत असून, अनेक ठिकाणी झुंबड उडाल्याचे चित्र पाहायला मिळत आहे. युद्धसदृश परिस्थिती आणि इंधनटंचाईच्या अफवांमुळे पुढील काळात पेट्रोल-डिझेल मिळणार नाही, या भीतीने नागरिक मोठ्या प्रमाणात इंधन साठवण्याकडे वळले आहेत.
शहरातील अनेक पेट्रोल पंपांवर नागरिक मोठमोठ्या ड्रममध्ये डिझेल भरून साठवणूक करताना दिसत आहेत. वाहनांसाठी इंधन मिळावे म्हणून नागरिकांनी लांबच लांब रांगा लावल्या असून, ट्रक, ट्रॅक्टर, टेम्पो आणि इतर मोठी वाहनेही मोठ्या प्रमाणात पंपांवर दाखल होत आहेत. त्यामुळे आधीपासून रांगेत उभ्या असलेल्या नागरिकांना ताटकळत थांबावे लागत आहे.
वाढत्या गर्दीत वादावादी
दि. १८ रोजी रात्री सुमारे नऊ वाजण्याच्या सुमारास स्टेशन भागातील जिनवाला पेट्रोल पंपावर वाढत्या गर्दीमुळे नागरिकांमध्ये जोरदार वादावादी झाल्याची माहिती समोर आली आहे. काहीवेळा परिस्थिती इतकी तणावपूर्ण झाली की नागरिक एकमेकांवर धावून जात असल्याचेही पाहायला मिळाले. या प्रकारामुळे कोणताही अनुचित प्रकार घडण्याची शक्यता नाकारता येत नाही.
पोलिस बंदोबस्ताची मागणी
शहरातील परिस्थिती लक्षात घेता प्रत्येक पेट्रोल पंपावर पोलीस बंदोबस्त ठेवण्यात यावा किंवा किमान एका पोलीस कर्मचाऱ्याची नियुक्ती करावी, अशी मागणी नागरिकांकडून करण्यात येत आहे. त्यामुळे गर्दी नियंत्रणात राहून संभाव्य भांडणे आणि अनुचित प्रकार टाळता येतील, असे नागरिकांचे म्हणणे आहे.
दरम्यान, आमच्या प्रतिनिधींनी शहरातील विविध पेट्रोल पंपांना भेट दिली असता काही ठिकाणी डिझेल-पेट्रोलचा साठा संपल्याने पंप बंद असल्याचे दिसून आले, तर काही ठिकाणी वाहनांच्या लांबच लांब रांगा लागलेल्या होत्या.
आता शहरातील पेट्रोल-डिझेलसाठी सुरू असलेली ही तारांबळ प्रशासनाच्या उपाययोजनांमुळे थांबणार का, याकडे सर्वांचे लक्ष लागले आहे.
