सोनुना/नवेगाव :
गोरगरीब आणि गरजू नागरिकांच्या मदतीसाठी नेहमी पुढाकार घेणारे सामाजिक कार्यकर्ते निलेश तोताराम कापकर यांनी पुन्हा एकदा आपल्या सामाजिक बांधिलकीचा परिचय दिला आहे. सोनुना येथील एका अंध कीर्तनकार महाराजांच्या मुलीच्या विवाहासाठी तसेच नवेगाव येथील कॅन्सरग्रस्त कुटुंबाला त्यांनी आर्थिक मदतीचा हात दिला आहे.
अंध कीर्तनकाराच्या मुलीच्या विवाहासाठी १० हजारांची मदत
सोनुना येथील दोन्ही डोळ्यांनी अंध असलेले कीर्तनकार धनराज महाराज उत्तम गिऱ्हे यांच्या मुलीचा विवाह निश्चित झाला आहे. मात्र, घरची आर्थिक परिस्थिती अत्यंत हलाखीची असल्याने महाराजांच्या भक्तांनी सामाजिक कार्यकर्ते निलेश कापकर यांच्याकडे मदतीची विनंती केली होती.
या विनंतीला प्रतिसाद देत आणि महाराजांबद्दल असलेल्या आदरापोटी निलेश कापकर यांनी तात्काळ १० हजार रुपयांची रोख मदत सुपूर्द केली. या मदतीमुळे महाराज आणि त्यांच्या कुटुंबीयांनी समाधान व्यक्त करत कापकर यांचे आभार मानले.
कॅन्सरग्रस्त ससाणे कुटुंबालाही मदतीचा हात
नवेगाव येथील गजानन मोतीराम ससाणे यांच्या पत्नी गेल्या सात महिन्यांपासून कॅन्सरसारख्या गंभीर आजाराशी झुंज देत आहेत. त्यांच्यावर मुंबईतील टाटा रुग्णालयात उपचार सुरू असून आतापर्यंत लाखो रुपयांचा खर्च झाला आहे. पुढील उपचारासाठी आणखी मोठ्या आर्थिक मदतीची गरज असल्याचे समोर आले आहे.
या परिस्थितीची माहिती मिळताच निलेश कापकर यांनी थेट ससाणे कुटुंबाच्या घरी भेट देत त्यांना धीर दिला. त्यांनी वैयक्तिक स्वरूपात ५ हजार रुपयांची आर्थिक मदत केली. तसेच प्रवासादरम्यान ससाणे यांचा मोबाईल चोरीला गेल्याचे समजताच स्वतःजवळील मोबाईल फोनही त्यांना भेट दिला.
मुंबईत वैद्यकीय मदतीचे आश्वासन
याशिवाय शिवसेना (शिंदे गट) तसेच रुग्णसेवक मंगेश केणेकर यांच्याशी संपर्क साधून मुंबईत उपचारासाठी शासकीय आणि वैद्यकीय मदत मिळवून देण्याचे आश्वासनही निलेश कापकर यांनी दिले आहे.
तसेच आदिवासी आणि ग्रामीण भागातील या गरजू ससाणे कुटुंबाला मदतीसाठी दानशूर व्यक्तींनी पुढे यावे, असे आवाहनही त्यांनी केले आहे.
