पंढरपूर-कुर्डूवाडी रोडवरील रोपळे चौकात भरधाव आणि ओव्हरलोड टिपरने भीषण अपघात घडवून मेढापूर येथील विजय पवार या तरुणाचा जागीच दुर्दैवी मृत्यू झाला. या अपघातात एका चारचाकी वाहनालाही जोरदार धडक बसली असून वाहनाचे मोठे नुकसान झाले आहे. सुदैवाने एअरबॅग उघडल्याने चालकाचा जीव वाचला.
प्रत्यक्षदर्शींनी दिलेल्या माहितीनुसार, गौण खनिज मुरूम वाहतूक करणारा भरधाव टिपर (MH 13 AX 3840) रोपळे चौकातून जात असताना मोटारसायकलस्वार विजय पवार (MH 45 U 7539) यांना जोरदार धडक देत चिरडून गेला. अपघात इतका भीषण होता की तरुणाच्या शरीराचे तुकडे गोळा करून रुग्णवाहिकेतून शवविच्छेदनासाठी पाठवावे लागले. या घटनेने परिसरात हळहळ व्यक्त होत असून नातेवाईकांनी घटनास्थळी टाहो फोडला.
अपघातानंतर टिपरने पंढरपूरहून कुर्डूवाडीच्या दिशेने जाणाऱ्या चारचाकी वाहनालाही (MH 14 EH 6089) धडक दिली. वाहनाचे मोठे नुकसान झाले असले तरी चालक बचावला.
घटनास्थळी मोठ्या प्रमाणात नागरिकांची गर्दी झाली होती. स्थानिक नागरिकांनी संताप व्यक्त करत प्रशासनावर निष्काळजीपणाचा आरोप केला. “या मार्गावरून रोज भरधाव वेगाने वाळू व मुरूम वाहतूक करणारे टिपर धावत असतात. चौकाजवळ शाळा असून विद्यार्थ्यांची मोठी वर्दळ असते. येथे गतिरोधक बसवण्याची मागणी अनेकदा MSRDC अधिकाऱ्यांकडे करण्यात आली होती. मात्र प्रशासनाने दुर्लक्ष केले,” असा आरोप ग्रामस्थांनी केला.
नागरिकांच्या मते, चौकात गतिरोधक असता तर हा अपघात टाळता आला असता. या मार्गावर ओव्हरलोड वाहतूक आणि भरधाव वेगामुळे आढीव, बाभुळगाव आणि रोपळे परिसरातील नागरिकांमध्ये भीतीचे वातावरण निर्माण झाले आहे.
या प्रकरणाचा पुढील तपास पंढरपूर ग्रामीण पोलीस ठाण्याचे पोलीस निरीक्षक शहाजी गोसावी, महेश रोकडे आणि भोसले साहेब करत असून संबंधित टिपर ताब्यात घेण्यात आला आहे.
दरम्यान, “वाळू आणि गौण खनिज माफियांवर कठोर कारवाई झाली नाही तर गावकरी आणि शालेय विद्यार्थ्यांसह तीव्र आंदोलन छेडले जाईल,” असा इशारा स्थानिक नागरिकांनी दिला आहे.
