श्रीरामपूर/प्रतिनिधी
राहता तालुक्यातील पिंपरी निर्मळ येथे उघडकीस आलेल्या बेकायदेशीर गर्भलिंग निदान आणि गर्भपात प्रकरणात दररोज नवे धक्कादायक खुलासे समोर येत आहेत. या प्रकरणाचे धागेदोरे आता थेट पुणे जिल्ह्यातील मावळ तालुक्यापर्यंत पोहोचले असून, या आंतरजिल्हा रॅकेटमध्ये आतापर्यंत एकूण १७ आरोपी निष्पन्न झाले आहेत. यापैकी १६ जणांना पोलिसांनी अटक केली आहे.
तपासादरम्यान पुण्यातील मुख्य एजंट आणि संबंधित डॉक्टरांनी आणखी एक पोर्टेबल सोनोग्राफी मशीन वडगाव मावळ येथे विकल्याचे समोर आले आहे. या प्रकरणात पोलिसांनी मारुती विश्वनाथ ढोरे (वय ४८, रा. वडगाव मावळ) याला आरोपी केले असून, तपासासाठी हजर राहण्याची नोटीस बजावण्यात आली आहे.
पोलिसांनी वडगाव मावळ येथून जप्त केलेल्या पोर्टेबल सोनोग्राफी मशीनच्या माध्यमातून मारुती ढोरे हा स्वतः बेकायदेशीर गर्भलिंग निदान चाचण्या करत असल्याचे तपासात निष्पन्न झाले आहे. विशेष म्हणजे, वैद्यकीय क्षेत्रातील कोणतीही पदवी किंवा अधिकृत परवाना नसतानाही तो हा बेकायदेशीर व्यवसाय चालवत होता, अशी धक्कादायक माहिती समोर आली आहे.
सध्या त्याची शारीरिक स्थिती अटक करण्याजोगी नसल्याने लोणी पोलिसांनी त्याला कायदेशीर नोटीस देत चौकशीसाठी हजर राहण्याचे आदेश दिले आहेत. या प्रकरणाचा तपास अधिक गतीने सुरू असून, आणखी काही धक्कादायक माहिती समोर येण्याची शक्यता पोलिसांनी व्यक्त केली आहे.
