मारेगाव | प्रतिनिधी :
मारेगाव येथील चर्चित व्यक्ती म्हणून परिचित असलेले सचिन जगनराव देवाळकर (वय अंदाजे ३७, रा. मारेगाव) यांचा भीषण अपघातात दुर्दैवी मृत्यू झाला. या घटनेमुळे मारेगाव परिसरात हळहळ व्यक्त केली जात आहे.
प्राप्त माहितीनुसार, सचिन देवाळकर हे चंद्रपूर येथे एका खासगी कंपनीत कामाला होते. कामानिमित्त ते मारेगावहून चंद्रपूरकडे कारने जात असताना यवतमाळ-वणी महामार्गावरील सोमनाळा फाट्याजवळ विरुद्ध दिशेने भरधाव येणाऱ्या पिकअपने त्यांच्या कारला जोरदार धडक दिली.
या भीषण अपघातात सचिन देवाळकर गंभीर जखमी झाले. त्यांना तातडीने मारेगाव ग्रामीण रुग्णालयात दाखल करण्यात आले. मात्र वैद्यकीय अधिकाऱ्यांनी तपासणीनंतर त्यांना मृत घोषित केले
दरम्यान, यवतमाळ-वणी महामार्गावर वारंवार अपघात होत असल्याने नागरिकांमध्ये संताप व्यक्त केला जात आहे. “या मार्गावर सतत अपघात होत असतानाही प्रशासनाकडून ठोस उपाययोजना का केल्या जात नाहीत?” असा सवाल स्थानिक नागरिकांकडून उपस्थित केला जात आहे.
या अपघातामागील नेमके कारण अद्याप स्पष्ट झाले नसून मारेगाव पोलीस पुढील तपास करीत आहेत.
