दरेगाव | प्रतिनिधी
दरेगाव येथे दिनांक १७ मे २०२६ रोजी सकाळी ९ वाजता ग्रामपंचायत कार्यालयात शेतकऱ्यांची बैठक आयोजित करण्यात आली होती. या बैठकीत महाडीबीटी योजनेअंतर्गत शेतकऱ्यांना शंभर टक्के अनुदानावर बियाणे उपलब्ध करून देण्यात येत असल्याची माहिती देण्यात आली.
कृषी सहाय्यक सोनवणे मॅडम यांनी उपस्थित शेतकऱ्यांना मार्गदर्शन करताना सांगितले की, शासनाच्या महाडीबीटी योजनेअंतर्गत सोयाबीन, तूर आदी विविध पिकांच्या बियाण्यांवर शंभर टक्के अनुदान देण्यात येत आहे. त्यामुळे जास्तीत जास्त शेतकऱ्यांनी ऑनलाइन अर्ज करून या योजनेचा लाभ घ्यावा, असे आवाहन त्यांनी केले.
तसेच शासनाच्या विविध कृषी योजनांचा फायदा घेण्यासाठी शेतकऱ्यांनी वेळेत नोंदणी करणे आवश्यक असल्याचेही त्यांनी स्पष्ट केले.
या बैठकीला तंटामुक्त समिती अध्यक्ष बबन जायभाय, प्रा. रवी चाटे सर, शेषराव काळुसे यांच्यासह गावातील प्रतिष्ठित नागरिक आणि शेतकरी मोठ्या संख्येने उपस्थित होते.
बैठकीच्या माध्यमातून शेतकऱ्यांना योजनांविषयी सविस्तर माहिती देण्यात आली असून, शासनाच्या योजनांचा लाभ घेण्यासाठी पुढाकार घ्यावा, असे आवाहन यावेळी करण्यात आले.
