वरोरा | प्रतिनिधी
वरोरा तालुक्यातील माढेळी येथील एचपी पेट्रोल पंपावर पेट्रोल व डिझेलचा तुटवडा निर्माण झाल्याने शेतकरी आणि वाहनधारकांची मोठी गैरसोय होत आहे. पेरणीचा हंगाम तोंडावर आला असताना इंधन उपलब्ध नसल्यामुळे शेतकरी चिंतेत सापडला आहे.
आज दिनांक २१ मे २०२६ रोजी माढेळी येथील पेट्रोल पंपावर डिझेल आणि पेट्रोल मिळत नसल्याने वाहनांच्या लांबच लांब रांगा लागल्या होत्या. शेती मशागतीची कामे सुरू असताना ट्रॅक्टरसाठी डिझेल मिळत नसल्यामुळे अनेक शेतकऱ्यांची कामे रखडली आहेत.
स्थानिक शेतकऱ्यांनी सांगितले की, पावसाळा आणि पेरणीचा हंगाम सुरू होण्याच्या पार्श्वभूमीवर डिझेलची मोठ्या प्रमाणात गरज असते. मात्र सध्या इंधनटंचाईमुळे शेतीची मशागत आणि इतर कृषी कामांवर परिणाम होत आहे.
दरम्यान, शासनाने या गंभीर समस्येकडे तातडीने लक्ष देऊन माढेळी परिसरात डिझेल व पेट्रोलचा सुरळीत पुरवठा करावा, अशी मागणी ग्रामस्थ आणि शेतकऱ्यांकडून करण्यात येत आहे.
