गडचिरोली | प्रतिनिधी
गडचिरोली जिल्ह्यात नक्षलवादाचे उच्चाटन करण्यासाठी सुरू असलेल्या ‘ऑपरेशन अंतिम प्रहार’ अंतर्गत पोलिसांना मोठे यश मिळाले आहे. आगामी निवडणुका आणि नक्षल सप्ताहाच्या पार्श्वभूमीवर घातपात घडवण्याचा नक्षलवाद्यांचा कट पोलिसांनी उधळून लावला आहे.
पोलिसांनी दिलेल्या माहितीनुसार, १६ मे रोजी आत्मसमर्पण केलेल्या काही नक्षलवाद्यांच्या चौकशीतून बिनागुंडा जंगल परिसरात शस्त्रे आणि साहित्य लपवून ठेवल्याची माहिती मिळाली होती. या माहितीच्या आधारे २१ मे रोजी पोलीस अधीक्षक एम. रमेश यांच्या मार्गदर्शनाखाली ‘सी-६०’, ‘प्राणहिता’ आणि बॉम्ब शोधक-नाशक पथकाने (BDDS) संयुक्त शोधमोहीम राबवली.
२२ मे रोजी सकाळी बिनागुंडाच्या घनदाट जंगलात जमिनीखाली लपवून ठेवलेला शस्त्रनिर्मिती कारखाना पोलिसांनी शोधून काढला. या ठिकाणाहून लेथ मशीन, बीजीएल पाईप्स, १२ बोअर पाईप, इन्व्हर्टर, जनरेटर, ड्रिलिंग मशीन तसेच सोलर पॅनल यांसारखे साहित्य जप्त करण्यात आले.
वरिष्ठ अधिकाऱ्यांच्या आदेशानुसार घटनास्थळीच हे साहित्य नष्ट करण्यात आले. या कारवाईमुळे नक्षलवादी चळवळीला मोठा धक्का बसल्याचे पोलिसांनी सांगितले आहे.
दरम्यान, जिल्ह्यातील नक्षलवाद आता अंतिम टप्प्यात पोहोचला असून पोलिसांचे अभियान अधिक तीव्र करण्यात आले आहे. मोहिमेत सहभागी जवानांच्या धाडसाचे वरिष्ठ अधिकाऱ्यांनी कौतुक केले आहे.
