काम गुणवत्तापूर्ण व वेळेत पूर्ण करण्याच्या सूचना
नेर :
भारत निवडणूक आयोगाच्या Special Intensive Revision (SIR) अर्थात विशेष सखोल मतदार यादी पुनर्निरीक्षण मोहिमेअंतर्गत सुरू असलेल्या कामांचा आढावा घेण्यासाठी जिल्हाधिकारी तथा जिल्हा निवडणूक अधिकारी विकास मीना यांनी आज नेर तालुक्याला भेट दिली.
यावेळी त्यांनी नेर नगर परिषदेच्या चार शाळांना भेट देऊन तेथे सुरू असलेल्या मतदार यादी पुनर्निरीक्षणाच्या कामाची प्रत्यक्ष पाहणी केली. बूथ लेव्हल अधिकारी (BLO) यांच्याशी संवाद साधून कामाची प्रगती, मतदार पडताळणी प्रक्रिया, नागरिकांशी समन्वय तसेच येणाऱ्या अडचणींची सविस्तर माहिती घेतली.
जिल्हाधिकारी विकास मीना यांनी BLO यांना मार्गदर्शन करताना मतदार यादी अद्ययावत, अचूक व त्रुटीरहित करण्यासाठी प्रत्येक नोंदीची काळजीपूर्वक पडताळणी करण्याच्या सूचना दिल्या. तसेच हे काम गुणवत्तापूर्ण, पारदर्शक आणि विहित मुदतीत पूर्ण करण्यावर भर देत आवश्यक निर्देश दिले.
या पाहणी दौऱ्यात नेरचे तहसीलदार पुरुषोत्तम भूसारी, निवडणूक नायब तहसीलदार रविंद्र पंधरे तसेच नगर परिषदेच्या मुख्याधिकारी थोटे मॅडम उपस्थित होत्या. त्यांनीही BLO यांच्याशी संवाद साधून सुरू असलेल्या कामाचा आढावा घेत आवश्यक ते मार्गदर्शन केले.
मतदार यादी अधिक विश्वासार्ह, अद्ययावत आणि सर्वसमावेशक करण्याच्या उद्देशाने राबविण्यात येत असलेल्या SIR मोहिमेला जिल्हा प्रशासनाकडून विशेष प्राधान्य दिले जात असून, नागरिकांनी आवश्यक कागदपत्रांसह सहकार्य करून मतदार यादी अचूक करण्यासाठी सक्रिय सहभाग नोंदवावा, असे आवाहन यावेळी करण्यात आले.
