FDA व पोलिसांची संयुक्त कारवाई; १३ आरोपी अटकेत
मंचर प्रतिनिधी :
अन्न व औषध प्रशासन (FDA) आणि लोकल क्राईम ब्रँच पोलिसांच्या संयुक्त कारवाईत उघडकीस आलेल्या दूध भेसळ प्रकरणात पुणे जिल्ह्यासह राज्यातील विविध भागांतील २६ आरोपींविरुद्ध गुन्हा दाखल करण्यात आला आहे. या प्रकरणात आतापर्यंत १३ जणांना अटक करण्यात आली असून उर्वरित आरोपींचा शोध सुरू आहे.
ग्राहकांच्या आरोग्याशी खेळ करत दूधामध्ये भेसळ करणाऱ्या या रॅकेटविरोधात प्रशासनाने मोठी कारवाई केली आहे. या कारवाईमुळे पुणे जिल्ह्यातील आंबेगाव, जुन्नर, शिरूर, खेड परिसरासह इतर भागांत खळबळ उडाली आहे.
या प्रकरणातील आरोपींमध्ये सुशांत हिंगे (अवसरी बुद्रुक, मंचर), हेमंत टेके (अकलूज, सोलापूर), संदीप लोधा (मंचर), संजोग यादव (भिवंडी), चेतन भोर (जुन्नर), कैलास राठोड (शिरूर), कुणाल कुलथे (जुन्नर), शुभम शिरसाठे (अहिल्यानगर), सचिन सपकाळ (सिल्लोड), वैभव हांडे (जुन्नर), शुभम वाळुंज (मंचर), अभिजित करंडे (राहुरी), रोशन दरेकर (अवसरी, मंचर), राजू सांडभोर (अवसरी, मंचर), प्रमोद घोरपडे (राहुरी), प्रमोद कडू (राहुरी), बापूराव गाडे (दौंड), सोनू घोरपडे (सोलापूर), विठ्ठल जाधव (पाबळ), अभिजित काटे (उरळी कांचन), अभिजित शेंडकर (माही, जळगाव), आकाश सावंत (जुन्नर), सतीश केसळे (पाबळ), मनोहर ढमाले (कडूस), ठकसेन अरगडे (पिंपळगाव) आणि राजू तांबे (तांबे मळा) यांचा समावेश आहे.
अधिकाऱ्यांनी दिलेल्या माहितीनुसार, दूध भेसळीसाठी वापरले जाणारे साहित्य जप्त करण्यात आले असून त्याची प्रयोगशाळेमध्ये तपासणी सुरू आहे. या रॅकेटमध्ये आणखी काही जणांचा सहभाग आहे का, याचाही तपास पोलिस आणि FDA कडून करण्यात येत आहे.
ग्राहकांच्या आरोग्याशी तडजोड करणाऱ्यांविरोधात भविष्यातही कठोर कारवाया सुरू राहतील, असा इशारा प्रशासनाने दिला आहे.
