सांगली | प्रतिनिधी
सांगली महानगरपालिकेने वारणाली येथे उभारलेल्या बहुप्रतिक्षित मल्टीस्पेशालिटी हॉस्पिटलचे सार्वजनिक-खासगी भागीदारी (PPP) तत्त्वावर तब्बल ३० वर्षांसाठी खासगी संस्थेकडे संचालन सोपविण्याचा प्रस्ताव तयार केल्याची माहिती समोर आली आहे. हा प्रस्ताव महासभेपुढे मांडला जाणार असल्याचे समजत असून, यामुळे शहरात राजकीय तसेच सामाजिक वर्तुळात मोठी चर्चा रंगली आहे.
महानगरपालिका क्षेत्रातील नागरिकांना अत्याधुनिक आणि परवडणाऱ्या आरोग्यसेवा उपलब्ध व्हाव्यात या उद्देशाने वारणाली मल्टीस्पेशालिटी हॉस्पिटलची उभारणी करण्यात आली होती. सुमारे १५ कोटी रुपये खर्च करून रुग्णालयाची भव्य इमारत, आवश्यक पायाभूत सुविधा आणि काही अत्याधुनिक वैद्यकीय उपकरणे उपलब्ध करून देण्यात आली आहेत.
मात्र, आता या रुग्णालयाचे संचालन महानगरपालिकेने स्वतः करण्याऐवजी खासगी संस्थेकडे देण्याची तयारी सुरू असल्याचे समोर आले आहे. प्रशासनाच्या माहितीनुसार, महानगरपालिकेचे वार्षिक अंदाजपत्रक सुमारे १,६१६ कोटी रुपये असले तरी रुग्णालय चालविण्यासाठी दरवर्षी अंदाजे ७.१४ कोटी रुपयांचा खर्च अपेक्षित आहे. हा खर्च आर्थिकदृष्ट्या मोठा भार ठरू शकतो, त्यामुळे PPP मॉडेलचा पर्याय विचाराधीन असल्याचे सांगितले जात आहे.
दरम्यान, या प्रस्तावावर नागरिक आणि विविध सामाजिक संघटनांकडून तीव्र नाराजी व्यक्त केली जात आहे. सार्वजनिक निधीतून उभारण्यात आलेले रुग्णालय खासगी संस्थेकडे दिल्यास सर्वसामान्य नागरिकांना उपचारांसाठी जादा शुल्क आकारले जाईल, अशी भीती व्यक्त केली जात आहे. आरोग्यसेवा हा नागरिकांचा मूलभूत हक्क असून त्याचे व्यापारीकरण होऊ नये, अशी मागणी नागरिकांकडून करण्यात येत आहे.
या निर्णयामुळे प्रशासनाच्या भूमिकेवर प्रश्नचिन्ह उपस्थित केले जात असून, रुग्णालयाच्या खासगीकरणाच्या विरोधात नागरिकांमध्ये संतापाची लाट निर्माण होत आहे. आता हा प्रस्ताव महासभेत मंजूर होतो की त्यावर आक्षेप घेतले जातात, याकडे सांगलीकरांचे लक्ष लागले आहे.
