खटाव प्रतिनिधी
पुसेगाव पोलीस ठाण्याच्या हद्दीत गेल्या सहा महिन्यांपासून महावितरणच्या इलेक्ट्रिक पोलवरील अॅल्युमिनियम तारा चोरी करणाऱ्या सराईत टोळीचा पर्दाफाश करण्यात पोलिसांना मोठे यश आले आहे. सातारा स्थानिक गुन्हे शाखा आणि पुसेगाव पोलिसांनी केलेल्या संयुक्त कारवाईत एकूण पाच गुन्हे उघडकीस आले असून आरोपींकडून तब्बल ११ लाख ४३ हजार ६०० रुपयांचा मुद्देमाल हस्तगत करण्यात आला आहे.
गेल्या काही महिन्यांपासून पुसेगाव परिसरात महावितरणच्या तारा चोरीच्या घटना सातत्याने घडत होत्या. त्यामुळे नागरिकांमध्ये भीतीचे वातावरण निर्माण झाले होते तसेच वीजपुरवठ्यावरही परिणाम होत होता. या पार्श्वभूमीवर स्थानिक गुन्हे शाखेचे पोलीस निरीक्षक विश्वजीत घोडके तसेच पुसेगावचे सहाय्यक पोलीस निरीक्षक नागनाथ खुणे यांच्या पथकाने तपासाला गती दिली.
सखोल तपासादरम्यान खटाव तालुक्यातील चौघांचा या चोरीप्रकरणात सहभाग असल्याची खात्रीशीर माहिती पोलिसांना मिळाली. त्यानंतर पोलिसांनी आरोपींच्या हालचालींवर लक्ष ठेवून सापळा रचला आणि चार जणांना ताब्यात घेतले.
या कारवाईमुळे परिसरातील तारा चोरीच्या घटनांना आळा बसण्यास मदत होणार असल्याचे पोलिसांकडून सांगण्यात आले. पोलिसांकडून आरोपींची अधिक चौकशी सुरू असून या टोळीचा इतर गुन्ह्यांमध्येही सहभाग आहे का, याचा तपास केला जात आहे.
