परभणी | दि. 06 जुलै 2026
परभणी शहरातील जमजम कॉलनी परिसरातील पारवा गेट ते कवडगाव रोड हा मुख्य रस्ता अत्यंत खराब अवस्थेत असून नागरिकांना मोठ्या प्रमाणात त्रास सहन करावा लागत आहे. या गंभीर समस्येकडे प्रशासनाचे लक्ष वेधण्यासाठी राष्ट्रवादी काँग्रेस पक्ष (शरदचंद्र पवार)चे शहर सचिव शेख अल्ताफ शेख फत्रू यांनी परभणी महानगरपालिकेच्या महापौरांना निवेदन सादर करून तातडीने उपाययोजना करण्याची मागणी केली आहे.
निवेदनात नमूद करण्यात आले आहे की, सदर रस्त्यावर मोठमोठे खड्डे पडले असून गटारातील सांडपाणी रस्त्यावर येत असल्याने परिसरात चिखलाचे साम्राज्य निर्माण झाले आहे. यामुळे शाळकरी मुले, महिला, ज्येष्ठ नागरिक तसेच दैनंदिन प्रवाशांना मोठ्या अडचणींचा सामना करावा लागत आहे. अनेक किरकोळ अपघातही या ठिकाणी घडले असून पावसाळ्यात परिस्थिती आणखी गंभीर होण्याची शक्यता व्यक्त करण्यात येत आहे.
यावेळी शेख अल्ताफ यांनी प्रशासनाकडे पुढील प्रमुख मागण्या केल्या आहेत :
- पारवा गेट ते कवडगाव रोडची तात्काळ दुरुस्ती करण्यात यावी.
- रस्त्यावरील खड्डे त्वरित मुरूम व खडी टाकून भरून वाहतुकीयोग्य करण्यात यावेत.
- कायमस्वरूपी उपाययोजना म्हणून रस्त्याचे काँक्रीटीकरण करण्यात यावे.
- गटार लाईनची तातडीने साफसफाई करून सांडपाण्याचा निचरा सुरळीत करण्यात यावा.
शहरातील नागरिकांच्या सुरक्षिततेच्या दृष्टीने या मागण्यांची तातडीने दखल घेऊन आवश्यक कार्यवाही करावी, अशी अपेक्षा शेख अल्ताफ यांनी व्यक्त केली आहे. तसेच नागरिकांच्या मूलभूत सुविधांसाठी राष्ट्रवादी काँग्रेस पक्ष (शरदचंद्र पवार) सातत्याने आवाज उठवत राहील, असेही त्यांनी स्पष्ट केले.
