निलंबनाच्या मागणीसाठी आंदोलनाचा इशारा दिल्यानंतर ग्रामविकास अधिकाऱ्यांची लेखी माफी
धडगाव प्रतिनिधी :
शहादा तालुक्यातील पिंपर्डे ग्रामपंचायतीच्या ग्रामसेविका तथा ग्रामविकास अधिकारी श्रीमती दिपाली अरविंद उगलमुगले यांच्या विरोधात बिरसा फायटर्स संघटना व ग्रामस्थ आक्रमक झाले असून, त्यांच्या निलंबनाच्या मागणीसाठी आंदोलनाचा इशारा देण्यात आला होता. यानंतर अखेर ग्रामसेविका दिपाली उगलमुगले यांनी ग्रामपंचायत कर्मचारी दिनेश वाघ यांची सर्वांसमोर लेखी माफी मागितली आहे.
गेल्या तीन महिन्यांपासून ग्रामपंचायत कार्यालयात अनुपस्थित राहणे, गावकऱ्यांचे प्रश्न न सोडवणे, कर्मचाऱ्यांशी उद्धट वर्तन करणे तसेच ग्रामपंचायत कर्मचारी श्री. दिनेश लोटन वाघ यांना धमकी देऊन गैरवर्तन केल्याचा आरोप ग्रामसेविका दिपाली उगलमुगले यांच्यावर करण्यात आला होता. या प्रकरणी बिरसा फायटर्स संघटनेने गटविकास अधिकारी, पंचायत समिती शहादा यांना निवेदन देत त्यांना तात्काळ निलंबित करण्याची मागणी केली होती.
तक्रारीनुसार, “तु समोर भेट फक्त आता दाखवते तुला, तू विचार करून ठेव आता,” असा धमकीचा संदेश ग्रामसेविका यांनी व्हॉट्सअ‍ॅपवर पाठविल्याचा आरोप करण्यात आला होता. तसेच ग्रामस्थांशी आणि कर्मचाऱ्यांशी अपमानास्पद भाषेत बोलून धमकी देत असल्याचा आरोप उपसरपंच घनश्याम मराठे यांनी केला होता. या प्रकारामुळे ग्रामस्थ आणि बिरसा फायटर्स संघटना आक्रमक झाली होती.
दरम्यान, वाढत्या वादानंतर ग्रामसेविका दिपाली उगलमुगले यांनी लेखी माफीनामा सादर केला. माफीनाम्यात त्यांनी नमूद केले की, “ग्रामपंचायत कर्मचारी (शिपाई) यांना माझ्याकडून व्हॉट्सअ‍ॅप ग्रुपवर अपशब्द, बदनामीकारक आणि अपमानास्पद शब्द वापरण्यात आले. त्या संदर्भात सर्व ग्रामस्थ, ग्रामपंचायत सदस्य, सरपंच आणि उपसरपंच यांच्या समक्ष मी दिनेश लोटन वाघ यांची जाहीर माफी मागत आहे. यापुढे अशी कोणतीही घटना घडणार नाही, याची दक्षता घेण्याचे आश्वासन देते.”
हा लेखी माफीनामा ग्रामस्थ आणि ग्रामपंचायत सदस्यांच्या उपस्थितीत तक्रारदार दिनेश वाघ यांना देण्यात आला.
