शहादा | प्रतिनिधी
शहादा शहरातील नगरपालिका चौक परिसरात घरगुती गॅस सिलेंडरचा व्यावसायिक वापर करणाऱ्या हॉटेल व्यावसायिकांवर तहसील कार्यालयाच्या पुरवठा विभागाने सोमवारी सायंकाळी धडक कारवाई केली. या मोहिमेत तीन घरगुती गॅस सिलेंडर जप्त करण्यात आले असून, नियमबाह्य सिलेंडर वापरणाऱ्या व्यावसायिकांमध्ये खळबळ उडाली आहे.
शहरात गेल्या काही दिवसांपासून घरगुती गॅस सिलेंडरची टंचाई जाणवत आहे. अशा परिस्थितीत काही हॉटेल, उपहारगृहे आणि चहाच्या टपऱ्यांवर व्यावसायिक सिलेंडरऐवजी घरगुती गॅस सिलेंडरचा वापर होत असल्याच्या तक्रारी प्रशासनाकडे प्राप्त झाल्या होत्या. त्यामुळे सर्वसामान्य ग्राहकांना घरगुती सिलेंडर मिळण्यात अडचणी येत असल्याचे निदर्शनास आले.
या पार्श्वभूमीवर जिल्हाधिकारी डॉ. मिताली सेठी यांच्या आदेशानुसार जिल्हा पुरवठा अधिकारी कैलास पवार यांच्या मार्गदर्शनाखाली यापूर्वीही कारवाई करण्यात आली होती. त्यानंतर काही काळ व्यावसायिकांनी नियमांचे पालन केले; मात्र पुन्हा घरगुती सिलेंडरचा अवैध वापर सुरू झाल्याची माहिती पुरवठा विभागाला मिळाली.
त्यानुसार जिल्हा पुरवठा अधिकारी कैलास पवार आणि तहसीलदार संभाजी पाटील यांच्या मार्गदर्शनाखाली पुरवठा निरीक्षण अधिकारी शिरीष परदेशी, पुरवठा निरीक्षक किशोर भांदुर्गे आणि त्यांच्या पथकाने नगरपालिका चौकात अचानक छापा टाकून कारवाई केली. या कारवाईत नियमांचे उल्लंघन करणाऱ्या व्यावसायिकांकडून तीन घरगुती गॅस सिलेंडर जप्त करण्यात आले.
पुरवठा निरीक्षण अधिकारी शिरीष परदेशी यांनी सांगितले की, “व्यावसायिकांनी घरगुती गॅस सिलेंडरचा वापर टाळावा. हा कायदेशीरदृष्ट्या गंभीर गुन्हा असून नियमांचे उल्लंघन करणाऱ्यांवर यापुढेही सातत्याने कारवाई करण्यात येईल.”
सायंकाळच्या गर्दीच्या वेळी झालेल्या या कारवाईमुळे शहरातील इतर व्यावसायिकांमध्येही धास्ती निर्माण झाली आहे. घरगुती गॅसचा तुटवडा रोखण्यासाठी आणि काळाबाजाराला आळा घालण्यासाठी प्रशासनाने घेतलेल्या या भूमिकेचे नागरिकांकडून स्वागत होत आहे.
