आळेफाटा | प्रतिनिधी
जुन्नर तालुक्याच्या पूर्व भागात मोसमी पावसाने दमदार पुनरागमन केले असून, शनिवारपासून सुरू झालेला पाऊस सोमवारी (दि. ६) अधिकच जोरात बरसत आहे. सलग सुरू असलेल्या पावसामुळे परिसरातील नद्या, नाले आणि शेतांमध्ये पाणी साचले असून सर्वत्र पावसाळी वातावरण निर्माण झाले आहे.
आळेफाटा, पिंपरी पेंढार, राजुरी, बेल्हे, आणे तसेच परिसरातील पठार भागात संततधार पाऊस सुरू आहे. या पावसामुळे शेतकऱ्यांमध्ये आनंदाचे व समाधानाचे वातावरण असून खरीप हंगामातील पेरण्यांना वेग येण्याची अपेक्षा व्यक्त केली जात आहे.
गेल्या काही दिवसांपासून पावसाच्या प्रतीक्षेत असलेल्या शेतकऱ्यांना या दमदार पावसामुळे मोठा दिलासा मिळाला आहे. पावसामुळे विहिरी, तलाव आणि जलस्रोतांच्या पाणीपातळीत वाढ होण्यासही मदत होणार असल्याचे ग्रामस्थांनी सांगितले आहे
