श्रीरामपूर | प्रतिनिधी : बीड जिल्ह्यातील एका अल्पवयीन मुलीचे अपहरण करून तिला श्रीरामपूर येथे आणल्याप्रकरणी श्रीरामपूर शहर पोलिसांनी तातडीची कारवाई करत मुलीची सुखरूप सुटका केली. या प्रकरणात मुख्य आरोपीसह त्याच्या दोन नातेवाईकांना अटक करण्यात आली असून पुढील तपासासाठी त्यांना बीड पोलिसांच्या ताब्यात देण्यात आले आहे.
मिळालेल्या माहितीनुसार, ४ जुलै रोजी नेकनूर (जि. बीड) पोलीस ठाण्याचे हेड कॉन्स्टेबल व्ही. एम. क्षीरसागर व एच. एम. कदम हे तपासाच्या अनुषंगाने श्रीरामपूर शहर पोलीस ठाण्यात आले होते. त्यांनी पोलीस निरीक्षक विशाल खैरे यांची भेट घेऊन अल्पवयीन मुलीच्या अपहरणाची माहिती दिली तसेच तिचा फोटो पोलिसांना उपलब्ध करून दिला.
आरोपीचा ठावठिकाणा निश्चित नसतानाही श्रीरामपूर शहर पोलिसांनी केवळ मुलीच्या फोटोच्या आधारे शहरभर शोधमोहीम सुरू केली. पोलीस उपनिरीक्षक रोशन निकम यांच्या मार्गदर्शनाखाली हेड कॉन्स्टेबल मच्छिंद्र कातखडे, संपत बडे तसेच अमोल पडोळे, अजित पटारे, अमोल गायकवाड, ज्ञानेश्वर वाघमोडे, सचिन दुकळे, सागर बनसोडे आणि रविंद्र शिंदे यांच्या पथकाने कसून तपास करत संजयनगर (वॉर्ड क्र. १) परिसरातून संशयित आरोपी शुभम नामदेव मिसाळ (वय २२, रा. आगर कानडगाव, ता. वैजापूर, जि. छत्रपती संभाजीनगर) याला त्याच्या दोन नातेवाईकांसह ताब्यात घेतले.
या कारवाईदरम्यान पोलिसांनी अल्पवयीन मुलीची सुखरूप सुटका केली. त्यानंतर मुख्य आरोपी व त्याच्या दोन नातेवाईकांना पुढील कायदेशीर कारवाईसाठी नेकनूर (बीड) पोलिसांच्या ताब्यात देण्यात आले आहे.
या तत्पर आणि समन्वयपूर्ण कारवाईबद्दल श्रीरामपूर शहर पोलिसांच्या कार्याचे कौतुक होत आहे.
