पुरंदर | प्रतिनिधी
पुरंदर तालुक्यातील कोडीत खुर्द येथे प्रस्तावित विद्युत पारेषण प्रकल्पाला ग्रामस्थांनी तीव्र विरोध दर्शविला असून, शासनाने हा प्रकल्प सक्तीने राबविण्याचा प्रयत्न केल्यास तालुका, जिल्हा आणि आवश्यक असल्यास दिल्लीतील जंतरमंतर येथेही तीव्र आंदोलन छेडण्याचा इशारा दिला आहे.
ग्रामस्थांच्या म्हणण्यानुसार, या प्रकल्पाला विरोध दर्शविण्यासाठी कोडीत खुर्द ग्रामपंचायतीने विशेष ग्रामसभा घेऊन प्रकल्पाविरोधात ठराव मंजूर केला आहे. तसेच जिल्हाधिकारी, पुणे, तहसीलदार, पुरंदर आणि संबंधित विभागाकडे निवेदने सादर करून ग्रामस्थांना विस्थापित करणारा हा प्रकल्प नको असल्याची भूमिका स्पष्ट करण्यात आली आहे.
मात्र, २ जुलै रोजी हा प्रकल्प मंजूर झाल्याच्या बातम्या प्रसारमाध्यमांमध्ये प्रसिद्ध झाल्यानंतर ग्रामस्थांमध्ये तीव्र संतापाची लाट उसळली. यानंतर ५ जुलै रोजी ग्रामपंचायत कार्यालयासमोर ग्रामस्थांची बैठक घेऊन शासनाच्या निर्णयाचा निषेध करण्यात आला.
यावेळी ग्रामस्थांनी स्पष्ट भूमिका घेत, “ग्रामस्थांना विश्वासात न घेता हा प्रकल्प आमच्यावर लादण्याचा प्रयत्न झाल्यास पुरंदर तहसील कार्यालय, जिल्हाधिकारी कार्यालय तसेच आवश्यक असल्यास दिल्लीतील जंतरमंतर मैदानावरही आंदोलन करण्यात येईल. कोणत्याही परिस्थितीत हा प्रकल्प होऊ देणार नाही,” असा निर्धार व्यक्त केला.
तसेच पुरंदर-हवेलीचे आमदार विजय शिवतारे, पुरंदर पंचायत समितीचे सभापती अमित झेंडे, जिल्हा परिषद व पंचायत समिती सदस्य तसेच सर्व राजकीय पक्षांनी या आंदोलनाला पाठिंबा द्यावा, अशी मागणी ग्रामस्थांनी केली. भविष्यात या लढ्यात साथ देणाऱ्यांनाच ग्रामस्थ सहकार्य करतील, अशी भूमिकाही यावेळी मांडण्यात आली.
या बैठकीस सरपंच छाया खैरे, माजी सरपंच विशाल कांबळे, उपसरपंच बेबी खैरे, श्रीनाथ शिक्षण प्रसारक मंडळाचे अध्यक्ष भैय्यासाहेब खैरे, माजी सरपंच निलेश तळेकर, माजी सरपंच प्रदीप खैरे, तंटामुक्त समितीचे अध्यक्ष मोहन खैरे यांच्यासह विविध ग्रामस्थ मोठ्या संख्येने उपस्थित होते.
