गणपतीपुळे | प्रतिनिधी
आकाशवाणी रत्नागिरी केंद्राच्या पर्यटनविषयक लोकप्रिय ‘कोकण दर्शन’ कार्यक्रमात यावेळी रत्नागिरी जिल्ह्यातील निसर्ग, अध्यात्म आणि जागतिक वारशाचा अनोखा संगम श्रोत्यांना अनुभवता येणार आहे. शुक्रवार, १० जुलै २०२६ रोजी सकाळी ८.४० वाजता प्रसारित होणाऱ्या या विशेष भागामध्ये गणपतीपुळे आणि रत्नागिरी जिल्ह्यातील जागतिक महत्त्वाच्या कातळशिल्पांचा माहितीपूर्ण पर्यटन प्रवास उलगडण्यात येणार आहे.
या कार्यक्रमात गणपतीपुळे येथील स्वयंभू श्री गणपती मंदिर, नयनरम्य समुद्रकिनारा, धार्मिक पर्यटनाचे महत्त्व तसेच पर्यटकांना आकर्षित करणाऱ्या विविध वैशिष्ट्यांची माहिती दिली जाणार आहे. याशिवाय रत्नागिरी जिल्ह्यातील प्राचीन कातळशिल्पांचा इतिहास, त्यांचे पुरातत्त्वीय महत्त्व, जागतिक स्तरावर झालेली दखल आणि पर्यटन विकासातील योगदान यावरही सविस्तर प्रकाश टाकण्यात आला आहे.
कार्यक्रमात पर्यटन अभ्यासक श्रीवल्लभ साठे आणि कातळशिल्प अभ्यासक आनंद मराठे यांनी मार्गदर्शन केले आहे. कार्यक्रमाचे लेखन सोनाली सावंत यांचे असून, निवेदन व निर्मिती सहाय्य वंदना मुसळे आणि सोनाली सावंत यांनी केले आहे. कार्यक्रमाचे सादरीकरण विवेक वानखडे यांनी केले आहे.
हा विशेष कार्यक्रम आकाशवाणी रत्नागिरीच्या मध्यम लहरी ११४३ किलोहर्ट्झ, एफएम १०१.५ मेगाहर्ट्झ, NewsOnAir मोबाईल ॲप तसेच आकाशवाणी रत्नागिरीच्या अधिकृत डिजिटल माध्यमांवर ऐकता येणार आहे. कोकणातील पर्यटन, इतिहास आणि सांस्कृतिक वारशाची आवड असलेल्या श्रोत्यांनी या विशेष कार्यक्रमाचा लाभ घ्यावा, असे आवाहन करण्यात आले आहे.
