सातारा | प्रतिनिधी
सातारा जिल्ह्यातील बोरगाव पोलीस ठाण्याच्या हद्दीत राष्ट्रीय महामार्गावर दरोडा टाकून जबरी चोरी करणाऱ्या टोळीला अवघ्या १२ तासांत जेरबंद करण्यात बोरगाव पोलिसांना यश आले आहे. या कारवाईत पाच आरोपींसह एका अल्पवयीन मुलाला ताब्यात घेण्यात आले असून, सुमारे ६.९७ लाख रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, ३० जून रोजी पहाटे भरतगाव हद्दीतील राष्ट्रीय महामार्गावर ट्रकचालकाला चाकू-कोयत्याचा धाक दाखवत मोबाईल व रोख रक्कम असा १२,५०० रुपयांचा ऐवज लुटण्यात आला होता. त्यानंतर २८ जून रोजी अतित गावाजवळ पुलाच्या कामावरील मजुरांना धमकावत १४,७०० रुपयांचा ऐवज व लोखंडी बार लुटल्याची दुसरी घटना उघडकीस आली होती.
दोन्ही गुन्ह्यांचा तपास सुरू असताना प्रभारी अधिकारी सहाय्यक पोलीस निरीक्षक प्रशांत हुले यांच्या नेतृत्वाखाली डीबी पथकाने गोपनीय माहितीच्या आधारे संशयितांचा शोध घेत अतित परिसरातून आरोपींना ताब्यात घेतले. चौकशीदरम्यान त्यांनी दोन्ही दरोड्यांची कबुली दिली.
या कारवाईत पोलिसांनी तीन मोटारसायकली, महिंद्रा मॅक्सिमो प्लस वाहन, चार मोबाईल, तीन चाकू, एक कोयता, गुन्ह्यात वापरलेले कपडे तसेच लुटीतील मालमत्ता असा एकूण ६ लाख ९७ हजार रुपयांचा मुद्देमाल जप्त केला आहे.
अटक करण्यात आलेल्या आरोपींमध्ये अनिकेत चिंतामणी काळे (२४), शुभम बापू चव्हाण (२३), तेजस राजन कारंडे (२०), अभिजीत चिमन कांबळे (२८) आणि विराज किरण माने (२१) (सर्व रा. अतित, ता. सातारा) यांचा समावेश असून, एका अल्पवयीन मुलालाही ताब्यात घेण्यात आले आहे.
ही कारवाई पोलीस अधीक्षक निखील पिंगळे, अपर पोलीस अधीक्षक डॉ. वैशाली कडुकर आणि उपविभागीय पोलीस अधिकारी विपुल पाटील यांच्या मार्गदर्शनाखाली पार पडली. पुढील तपास सहाय्यक पोलीस निरीक्षक प्रशांत हुले करीत आहेत.
