जुन्नर | प्रतिनिधी
जुन्नर तालुक्यातील नारायणगाव येथील बजाज शोरूममध्ये चोरीची घटना घडली असून, सुमारे १ लाख ६७ हजार रुपये किमतीची बजाज डोमिनार D400 दुचाकी अज्ञात चोरट्याने लंपास केली आहे. या प्रकरणी नारायणगाव पोलीस ठाण्यात गुन्हा दाखल करण्यात आला आहे.
याबाबत विधान महेंद्र कसबे (वय २५, रा. नारायणगाव) यांनी फिर्याद दिली आहे. पोलिसांनी दिलेल्या माहितीनुसार, ७ जुलै रोजी सायंकाळी ७ वाजल्यापासून ८ जुलै रोजी सकाळी ९.३० वाजेपर्यंतच्या कालावधीत वालझाडे मळा परिसरातील शौर्य बजाज शोरूम येथे ही चोरी झाली.
चोरट्याने शोरूमच्या मागील बाजूच्या पत्र्याच्या शटरचे कुलूप तोडून आत प्रवेश केला. त्यानंतर शोरूममध्ये असलेली बजाज डोमिनार D400 दुचाकी तिच्या चावीसह चोरून नेली.
घटनेची माहिती मिळताच नारायणगाव पोलिसांनी घटनास्थळी भेट देऊन पाहणी केली असून, अज्ञात चोरट्याविरुद्ध गुन्हा दाखल करण्यात आला आहे. परिसरातील सीसीटीव्ही फुटेज आणि अन्य पुराव्यांच्या आधारे आरोपीचा शोध सुरू असल्याची माहिती पोलिसांनी दिली.
