चामोर्शी | प्रतिनिधी
कोरोना महामारीच्या काळात जीवाची पर्वा न करता सेवा बजावणाऱ्या आशा स्वयंसेविका व गटप्रवर्तकांना ग्रामपंचायत स्तरावरील तब्बल 31 महिन्यांचा कोरोना प्रोत्साहन भत्ता अद्याप न मिळाल्याच्या निषेधार्थ आयटकच्या नेतृत्वाखाली चामोर्शी येथे पंचायत समिती, तहसील कार्यालय आणि तालुका आरोग्य अधिकारी कार्यालयावर धडक आंदोलन करण्यात आले. प्रशासनाकडून लेखी आदेश देण्यात आल्यानंतर आंदोलन मागे घेण्यात आले.
आयटकचे राज्य सचिव कॉ. विनोद झोडगे पाटील यांच्या नेतृत्वाखाली झालेल्या आंदोलनात विविध मागण्यांचे निवेदन गटविकास अधिकारी प्रकाश पोळ, तहसीलदार प्रशांत घोरुडे, अन्न पुरवठा अधिकारी प्रशांत अंबादे आणि तालुका आरोग्य अधिकारी महेंद्र पेद्दाला यांना देण्यात आले.
निवेदनात कोरोना काळातील ग्रामपंचायत व नगरपंचायत स्तरावरील 31 महिन्यांचा दरमहा एक हजार रुपयांचा प्रोत्साहन भत्ता तातडीने अदा करावा, सरकारी कर्मचारी समजून बंद करण्यात आलेली आशा व गटप्रवर्तकांची राशन कार्डे पूर्ववत सुरू करावीत, निवडणूक संदर्भातील बीएलओ व एसआयआरची अतिरिक्त कामे थांबवावीत, तसेच ग्राम आरोग्य, पोषण, पाणीपुरवठा व स्वच्छता समितीच्या सचिव पदाचे दिलेले सामूहिक राजीनामे स्वीकारावेत, अशी मागणी करण्यात आली.
आंदोलनानंतर गटविकास अधिकारी प्रकाश पोळ यांनी संबंधित ग्रामपंचायतींना कोरोना प्रोत्साहन भत्ता अदा करण्याबाबत लेखी आदेश काढल्याची माहिती दिली. तसेच तहसीलदार प्रशांत घोरुडे आणि अन्न पुरवठा अधिकारी प्रशांत अंबादे यांनी बंद करण्यात आलेली राशन कार्डे पूर्ववत सुरू करण्याचे आश्वासन दिले.
या आंदोलनात आयटकचे राज्य सचिव कॉ. विनोद झोडगे पाटील, जिल्हा सचिव कॉ. सरिता नैताम, तालुका सचिव किरण गांधारे, गोपिका धूर्वे, निर्मला सोनटक्के, सोनिया चांदेकर, संगीता गुरनुले, पुष्पा बोटावार यांच्यासह तालुक्यातील मोठ्या संख्येने आशा स्वयंसेविका व गटप्रवर्तक सहभागी झाले.
