पलूस | प्रतिनिधी
सतत सुरू असलेल्या पावसामुळे कृष्णा नदीच्या पाणीपातळीत वाढ झाली असून, जुनेघोगाव–दुधोंडी हा संपर्क रस्ता पाण्याखाली गेला आहे. त्यामुळे या मार्गावरील वाहतूक तात्पुरती बंद करण्यात आली आहे.
ग्रामपंचायत घोगाव यांच्या वतीने नागरिकांना आवाहन करण्यात आले आहे की, पाण्यातून कोणत्याही परिस्थितीत मार्ग ओलांडण्याचा प्रयत्न करू नये. जीवितास धोका होऊ शकतो, त्यामुळे नागरिकांनी पर्यायी मार्गाचा वापर करावा.
प्रशासन परिस्थितीवर लक्ष ठेवून असून, पाणी ओसरल्यानंतरच रस्ता वाहतुकीसाठी खुला करण्यात येणार आहे. तोपर्यंत नागरिकांनी अफवांवर विश्वास न ठेवता प्रशासनाच्या सूचनांचे पालन करावे, असे आवाहन ग्रामपंचायतीने केले आहे.
