लोणी, ता. आंबेगाव | प्रतिनिधी
लोणी येथील लंकेवस्ती परिसरातील प्रगतशील शेतकरी वसंत नाना लंके यांनी सुमारे १५ गुंठे क्षेत्रात काकडीची लागवड केली असून पीक सध्या चांगल्या अवस्थेत आहे. काकडीची तोंडणी सुरू झाली असून उत्पादनही समाधानकारक मिळत असल्याची माहिती त्यांनी दिली.
काकडी हे कमी कालावधीत उत्पन्न देणारे नगदी पीक मानले जाते. लागवडीनंतर अवघ्या ४५ दिवसांत काकडी तोंडणीस येते. योग्य व्यवस्थापन आणि पोषक वातावरण असल्यास एका लागवडीत २० ते २२ तोडे मिळू शकतात. मात्र बियाणे, खते, औषधे, मजुरी, सिंचन आणि इतर खर्चामुळे लागवडीसाठी मोठी भांडवली गुंतवणूक करावी लागते.
सध्या बाजारात १० किलो काकडीला १८० ते २०० रुपये दर मिळत आहे. मात्र वाढलेला उत्पादन खर्च आणि घसरलेला बाजारभाव यामुळे काकडी उत्पादक शेतकऱ्यांमध्ये नाराजीचे वातावरण निर्माण झाले आहे. उत्पादन चांगले असूनही अपेक्षित आर्थिक लाभ मिळत नसल्याने शेतकऱ्यांनी काकडीला योग्य व हमीभाव देण्याची मागणी केली आहे.
शेतकरी वसंत नाना लंके म्हणाले, “काकडीच्या पिकासाठी सातत्याने देखभाल आणि खर्च करावा लागतो. उत्पादन चांगले मिळत असले तरी सध्याचा बाजारभाव परवडणारा नसल्याने शेतकऱ्यांना आर्थिक फटका बसत आहे.”
