मुंबई | प्रतिनिधी
मुंबईतील चारकोप परिसरातील दिंगेश्वर तलावात बुधवारी (दि. ८ जुलै) दुपारी सुमारे १.३० वाजता एका मुलाचा बुडाल्याची दुर्दैवी घटना घडली. घटनेची माहिती मिळताच अग्निशमन दलाने घटनास्थळी धाव घेत शोधमोहीम सुरू केली. मात्र, सुरुवातीच्या प्रयत्नांना यश आले नाही.
सिव्हिल डिफेन्स, आर/दक्षिण विभागाचे स्वयंसेवक मागेश देवेंद्रन हे सायंकाळी सुमारे ४ वाजता घटनास्थळी पोहोचले. त्यांनी आपत्ती नियंत्रण कक्षाशी संपर्क साधत प्रशिक्षित गोताखोरांची तातडीने आवश्यकता असल्याची माहिती वरिष्ठ अधिकाऱ्यांना दिली. तसेच माजी नियंत्रण कक्ष प्रभारी राजेंद्र लोखंडे यांच्या मार्गदर्शनाखाली विषयाचा पाठपुरावा करण्यात आला.
नौदलाला घटनेची माहिती देण्यात आली होती. मात्र, सायंकाळी ६.३० वाजेपर्यंत त्यांचे पथक घटनास्थळी पोहोचले नसल्याने पुन्हा वरिष्ठ स्तरावर पाठपुरावा करून एनडीआरएफची मदत मागविण्यात आली.
यानंतर रात्री ८ वाजता एनडीआरएफचे पथक घटनास्थळी दाखल झाले आणि प्रशिक्षित गोताखोरांच्या मदतीने शोधमोहीम सुरू करण्यात आली. त्यानंतर रात्री ९.४० वाजता नौदलाचे पथकही घटनास्थळी पोहोचले. नौदल आणि एनडीआरएफच्या पथकांनी संयुक्तरीत्या शोधकार्य सुरू ठेवले
सद्यस्थितीनुसार, एनडीआरएफचे गोताखोर आणि नौदलाचे पथक तलावात मुलाचा शोध घेण्यासाठी युद्धपातळीवर प्रयत्न करत असून, वृत्त लिहिपर्यंत शोधमोहीम सुरू होती.
