भिलवडी | प्रतिनिधी
भिलवडी शिक्षण संस्थेच्या सेकंडरी स्कूल अँड ज्युनिअर कॉलेजमध्ये शनिवार, ११ जुलै २०२६ रोजी पद्मश्री पुरस्काराने सन्मानित आणि भौतिकशास्त्र क्षेत्रातील आंतरराष्ट्रीय ख्यातीचे प्रा. एच. सी. वर्मा (IIT कानपूर) यांचे विशेष व्याख्यान आयोजित करण्यात आले आहे.
‘कॉन्सेप्ट्स ऑफ फिजिक्स’ या जगप्रसिद्ध पुस्तकाचे लेखक असलेले प्रा. वर्मा यांनी भौतिकशास्त्र विषय विद्यार्थ्यांसाठी सोपा, रंजक आणि समजण्यास सुलभ करण्यासाठी मोलाचे योगदान दिले आहे. दैनंदिन जीवनातील उदाहरणांच्या माध्यमातून अवघड संकल्पना सहज उलगडून सांगण्याची त्यांची शैली विद्यार्थ्यांमध्ये विशेष लोकप्रिय आहे.
कार्यक्रमानुसार सकाळी ८.०० ते १०.०० या वेळेत इयत्ता १० वी ते १२ वीच्या विद्यार्थ्यांसाठी विशेष व्याख्यान होणार आहे. त्यानंतर १०.३० ते १२.०० या वेळेत भिलवडी शिक्षण संस्थेतील सर्व शिक्षकांसाठी मार्गदर्शन सत्र आयोजित करण्यात आले आहे.
या कार्यक्रमाला संस्थेचे अध्यक्ष विश्वास चितळे, उपाध्यक्ष डॉ. बाळासाहेब चोपडे तसेच संस्थेचे संचालक उपस्थित राहणार आहेत. प्रा. वर्मा यांच्या भिलवडी दौऱ्याचे नियोजन विद्यालयाचे मुख्याध्यापक एस. एस. मोरे तसेच SSB IAPT अन्वेशिका, भिलवडीचे प्रमुख प्रा. डॉ. जी. बी. पाटील यांच्या प्रयत्नातून करण्यात आले आहे.
भौतिकशास्त्र विषयाची आवड निर्माण करणाऱ्या या अभ्यासपूर्ण व्याख्यानाचा लाभ विद्यार्थी, शिक्षक आणि विज्ञानप्रेमींनी मोठ्या संख्येने घ्यावा, असे आवाहन आयोजकांनी केले आहे.
