पाटण | प्रतिनिधी
सातत्याने सुरू असलेल्या मुसळधार पावसामुळे कडवे खुर्द-केळेवाडी (ता. पाटण) येथील डोंगरावरून मोठी दरड कोसळून रस्त्यावर माती व दगडांचा ढिगारा साचला होता. त्यामुळे वाहतुकीला अडथळा निर्माण होऊन नागरिकांना मोठा त्रास सहन करावा लागत होता.
या समस्येबाबत स्थानिक नागरिकांनी राज्याचे मंत्री शंभूराजे देसाई यांच्याकडे तक्रार केली. तक्रारीची तात्काळ दखल घेत त्यांच्या कार्यालयाकडून संबंधित प्रशासनाला आवश्यक सूचना देण्यात आल्या. त्यानंतर जेसीबीच्या सहाय्याने दरड हटविण्याचे काम युद्धपातळीवर सुरू करण्यात आले आहे.
सध्या घटनास्थळी माती व दगड हटवून रस्ता पूर्ववत करण्याचे काम वेगाने सुरू असून, वाहतूक सुरळीत करण्यासाठी प्रशासन प्रयत्नशील आहे.
दरड हटविण्याच्या कामाला त्वरित सुरुवात झाल्याने स्थानिक ग्रामस्थांनी समाधान व्यक्त करत मंत्री शंभूराजे देसाई तसेच संबंधित प्रशासनाचे आभार मानले आहेत.
