अमरावती | प्रतिनिधी | दि. ८ जुलै २०२६
आदिवासी विद्यार्थ्यांच्या बँक खात्यात डीबीटी (Direct Benefit Transfer) योजनेचे अनुदान अद्याप जमा झाले नसल्याने हजारो विद्यार्थ्यांना आर्थिक अडचणींचा सामना करावा लागत आहे. रखडलेले अनुदान तातडीने वितरित करण्यात यावे, या मागणीसाठी ऑल इंडिया स्टुडंट्स फेडरेशन (AISF) च्या नेतृत्वाखाली अमरावती येथील अप्पर आयुक्त, आदिवासी विकास विभाग कार्यालयासमोर ठिय्या आंदोलन करण्यात आले.
AISF च्या राज्य सचिव प्रतिक्षा ढोके यांच्या नेतृत्वाखाली झालेल्या आंदोलनात विद्यार्थ्यांनी आदिवासी विकास विभागाकडून राबविण्यात येणाऱ्या विविध योजनांचा लाभ वेळेत मिळत नसल्याचा आरोप केला. विशेषतः डीबीटीचे अनुदान रखडल्यामुळे विद्यार्थ्यांचे शिक्षण, वसतिगृह, प्रवास तसेच दैनंदिन खर्च भागविणे कठीण झाले असल्याचे आंदोलनकर्त्यांनी सांगितले.
यावेळी विद्यार्थ्यांनी डीबीटीचे थकीत अनुदान तातडीने खात्यात जमा करावे, योजना कायमस्वरूपी सुरू ठेवावी, आर्थिक निकषांमुळे लाभापासून वंचित राहिलेल्या विद्यार्थ्यांबाबत सकारात्मक निर्णय घ्यावा तसेच नव्याने प्रवेश घेतलेल्या विद्यार्थ्यांची डीबीटी प्रक्रिया त्वरित पूर्ण करावी, अशा प्रमुख मागण्या केल्या.
या मागण्यांसाठी AISF च्या वतीने सलग दोन दिवस धरणे आंदोलन करण्यात आले. अखेर खासदार बळवंत वानखेडे यांच्या मध्यस्थीनंतर अप्पर आयुक्त, आदिवासी विकास विभाग यांनी येत्या सात दिवसांत विद्यार्थ्यांच्या मागण्यांवर कार्यवाही करण्याचे लेखी आश्वासन दिल्यानंतर आंदोलन स्थगित करण्यात आले.
मात्र, सात दिवसांत मागण्या पूर्ण न झाल्यास आंदोलन पुन्हा तीव्र करण्यात येईल, असा इशारा AISF ने दिला आहे.
या आंदोलनात AISF च्या राज्य सचिव प्रतिक्षा ढोके, राज्य कौन्सिल सदस्य अनंता कराळे यांच्यासह अमरावती विभागातील विविध जिल्ह्यांतील मोठ्या संख्येने विद्यार्थी सहभागी झाले होते.
