पुणे | प्रतिनिधी
महाराष्ट्राचे माजी उपमुख्यमंत्री, ऑलिम्पिक असोसिएशनचे माजी अध्यक्ष दिवंगत अजितदादा पवार यांच्या जयंतीनिमित्त २२ जुलै रोजी पुणे ते बारामती राष्ट्रीय व राज्यस्तरीय सायकल स्पर्धेचे आयोजन करण्यात आले आहे. सायकलिंग फेडरेशन ऑफ इंडिया, नवी दिल्ली आणि सायकल असोसिएशन ऑफ महाराष्ट्र यांच्या सहकार्याने पुणे जिल्हा शिक्षण मंडळाने या स्पर्धेचे आयोजन केले आहे. या स्पर्धेत सहभागी होऊ इच्छिणाऱ्या स्पर्धकांनी नावनोंदणी करावी, असे आवाहन संस्थेचे उपाध्यक्ष राजेंद्र घाडगे आणि मानद सचिव अॅड. संदीप कदम यांनी केले आहे.
यंदा या स्पर्धेचे दहावे वर्ष असून स्पर्धा चार गटांत आयोजित करण्यात येणार आहे. त्यामध्ये पुणे ते बारामती १२२ किलोमीटर पुरुषांसाठी राष्ट्रीय व राज्यस्तरीय स्पर्धा, सासवड ते बारामती ८५ किलोमीटर पुरुषांसाठी खुली राज्यस्तरीय एमटीबी स्पर्धा आणि माळेगाव ते बारामती १५ किलोमीटर महिलांसाठी राष्ट्रीय स्पर्धा यांचा समावेश आहे.
प्रत्येक गटातील प्रथम तीन क्रमांक मिळविणाऱ्या स्पर्धकांना रोख पारितोषिक व स्मृतिचिन्ह प्रदान करण्यात येणार आहे. तसेच दिवे घाट सर्वप्रथम पार करणाऱ्या स्पर्धकाला राज्य व राष्ट्रीय स्तरावर ‘घाटाचा राजा’ हा मानाचा पुरस्कार देण्यात येणार आहे.
या स्पर्धेत देशभरातील राष्ट्रीय व आंतरराष्ट्रीय स्तरावरील सुमारे ४५० स्पर्धक सहभागी होत असतात. विशेष म्हणजे या स्पर्धेसाठी कोणत्याही प्रकारचे प्रवेश शुल्क आकारले जात नाही.
स्पर्धेत सहभागी होऊ इच्छिणाऱ्या स्पर्धकांनी सोबत दिलेला क्यूआर कोड स्कॅन करून नावनोंदणी करावी. तसेच अधिक माहितीसाठी सायकलिंग असोसिएशन ऑफ महाराष्ट्रचे सचिव संजय साठे (७९७२१८९६७०) आणि डॉ. योगेश पवार (९८५०९५२७८७) यांच्याशी संपर्क साधावा, असे आवाहन अॅड. संदीप कदम यांनी केले.
