अकोला | प्रतिनिधी
अकोला तालुक्यातील सांगळूद गावातील नागरिकांना गेल्या अनेक दिवसांपासून वारंवार खंडित होणाऱ्या वीजपुरवठ्याचा सामना करावा लागत होता. अखेर शिवसेनेच्या पाठपुराव्यानंतर रखडलेल्या कामाला सुरुवात झाल्याने गावकऱ्यांना मोठा दिलासा मिळाला आहे.
काही महिन्यांपूर्वी आपातापा–अनकवाडी दरम्यान नवीन वीजवाहिनी टाकण्यात आली होती. मात्र, हायटेन्शन लाईनमुळे खालील वीजतारा काढून टाकण्यात आल्याने त्या भागातील वीजपुरवठा बंद करण्यात आला होता. त्यानंतर जुन्या लाईनवरून वीजपुरवठा सुरू ठेवण्यात आला. मात्र, वारंवार वीजपुरवठा खंडित होत असल्याने नागरिकांना तीन ते चार तास वीजेशिवाय राहावे लागत होते.
या समस्येबाबत प्रज्वल बोंद्रे यांनी शिवसेना जिल्हाप्रमुख गोपालभाऊ दातकर यांच्याकडे पाठपुरावा केला. त्यानंतर दातकर यांनी महावितरणचे कार्यकारी अभियंता चांभरे आणि उपकार्यकारी अभियंता अग्रवाल यांची भेट घेऊन समस्या मांडली.
चर्चेदरम्यान अनकवाडीहून आलेल्या लाईनवरील बॅकसाईड हायटेन्शन क्रॉसिंगसाठी अंडरग्राऊंड केबल टाकल्यास सांगळूद व धोतर्डी गावांचा वीजपुरवठा सुरळीत होऊ शकतो, असे स्पष्ट झाले. संबंधित कंत्राटदाराने करारनाम्यात अंडरग्राऊंड केबलचा समावेश नसल्याचे सांगितल्यानंतर शिवसेनेने विद्युत विभागाकडे केबल उपलब्ध करून देण्याची मागणी केली. त्यानुसार महावितरणने तातडीने केबल उपलब्ध करून दिली असून कामाला सुरुवात करण्यात आली आहे.
यावेळी कार्यकारी अभियंत्यांसोबत झालेल्या चर्चेदरम्यान शिवसेना शहरप्रमुख राहुल कराळे, युवासेना जिल्हाप्रमुख तथा नगरसेवक अभयदादा खुमकर, शिवसेना तालुकाप्रमुख ज्ञानेश्वर गावंडे तसेच शिवसेना सोशल मीडिया जिल्हाप्रमुख प्रज्वल बोंद्रे उपस्थित होते.
