भडगाव | प्रतिनिधी
भडगाव तालुक्यातील कजगाव येथे पर्यावरण संवर्धनाचा संदेश देणारा एक हृदयस्पर्शी उपक्रम राबविण्यात आला. कजगावचे रहिवासी तथा माजी सरपंच निवृत्ती पवार यांचे सुपुत्र चेतन निवृत्ती पवार (वय ३२) यांचे ३ मार्च रोजी दीर्घ आजाराने निधन झाले.
मुलाच्या स्मृती चिरंतन राहाव्यात आणि पर्यावरण संवर्धनालाही हातभार लागावा या उद्देशाने पवार कुटुंबीयांनी पारंपरिक अस्थी विसर्जन न करता वृक्षारोपण करण्याचा निर्णय घेतला.
यावेळी चेतन पवार यांचा पाच वर्षीय मुलगा गौरव चेतन पवार याच्या हस्ते वृक्षाची लागवड करण्यात आली. वृक्षाचे संगोपन व संवर्धन करून त्याद्वारे आपल्या मुलाची आठवण कायम जपली जाईल, अशी भावना माजी सरपंच निवृत्ती पवार व पवार कुटुंबीयांनी व्यक्त केली.
या उपक्रमाचे परिसरातील नागरिकांनी स्वागत करत, पर्यावरण संरक्षणासह दिवंगतांच्या स्मृती जपण्याचा हा प्रेरणादायी संदेश असल्याची प्रतिक्रिया व्यक्त केली.
