कन्नड | प्रतिनिधी :
कन्नड तालुक्यातील पिशोर परिसरात अवैध धंद्यांविरोधात पिशोर पोलिसांनी धडक मोहीम राबवत अवैध दारूविक्रेते आणि मटका चालकांवर कारवाई केली. गुरुवार (दि. ९ जुलै) रोजी झालेल्या या विशेष मोहिमेत पाच गुन्हे दाखल करण्यात आले असून, एकूण ₹२ लाख २८ हजारांचा मुद्देमाल जप्त करण्यात आला आहे. या कारवाईमुळे परिसरातील अवैध धंदे करणाऱ्यांमध्ये खळबळ उडाली आहे.
पोलिसांनी विविध पथकांच्या माध्यमातून एकाच दिवशी पाच वेगवेगळ्या ठिकाणी छापे टाकले. पिशोर बाजारतळ येथे प्रतिबंधित देशी दारूची विक्री करणाऱ्यावर कारवाई करत ४८ सीलबंद देशी दारूच्या बाटल्या आणि एक दुचाकी असा ₹७५,७६० किमतीचा मुद्देमाल जप्त करण्यात आला.
चिंचोली (ली.) फाटा येथील नवीन बसस्थानकासमोर सुरू असलेल्या ‘मिलन कल्याण’ मटका अड्ड्यावर छापा टाकून रोख रक्कम व जुगाराचे साहित्य जप्त करण्यात आले. या कारवाईत ₹२,२४० किमतीचा मुद्देमाल हस्तगत करण्यात आला.
घाटशेंद्रा फाटा येथे देशी दारूची वाहतूक करणाऱ्यावर कारवाई करत २०० सीलबंद देशी दारूच्या बाटल्या आणि एक दुचाकी जप्त करण्यात आली. या कारवाईत ₹१ लाख १७ हजारांचा मुद्देमाल जप्त करण्यात आला.
तसेच धामणी शिवारात हातभट्टी दारूच्या दोन अड्ड्यांवर धाडी टाकून ५० लिटर तयार हातभट्टी दारू आणि ४८० लिटर रसायन नष्ट करण्यात आले. या कारवाईत ₹३३ हजारांचे नुकसान अवैध व्यवसायिकांना झाले.
ही मोहीम पोलीस अधीक्षक प्रकाश भा. जाधव, अपर पोलीस अधीक्षक प्रशांत स्वामी आणि सहायक पोलीस अधीक्षक अपराजिता अग्निहोत्री यांच्या मार्गदर्शनाखाली पार पडली. पिशोर पोलीस ठाण्याचे सहायक पोलीस निरीक्षक कुणाल सूर्यवंशी यांच्या नेतृत्वाखालील पथकाने ही कारवाई यशस्वीरीत्या पार पाडली.
अवैध दारूविक्री, जुगार आणि इतर बेकायदेशीर धंद्यांविरोधातील कारवाई यापुढेही अधिक तीव्र करण्यात येणार असून, अशा धंद्यांमध्ये सहभागी असणाऱ्यांवर कठोर कारवाई केली जाईल, असा इशारा पिशोर पोलिसांनी दिला आहे.
