मेहकर | प्रतिनिधी
मेहकर तालुक्यातील शेलगाव देशमुख येथील जिल्हा परिषद शाळेला मेहकर तहसील कार्यालयाचे नायब तहसीलदार नालट साहेब यांनी अचानक भेट देत मतदार यादी विशेष पुनरिक्षण मोहिमेचा आढावा घेतला. यावेळी बीएलओ (Booth Level Officer) यांना गणना पत्रकांचे शंभर टक्के वितरण करून प्राप्त झालेली माहिती तातडीने डिजिटल स्वरूपात नोंदविण्याच्या सूचना देण्यात आल्या.
या पाहणीदरम्यान नालट साहेब यांनी संबंधित शिक्षक व बीएलओंना घरोघरी जाऊन गणना पत्रके वितरित करावीत, नागरिकांना आवश्यक मार्गदर्शन करावे तसेच प्राप्त सर्व माहिती वेळेत ऑनलाइन नोंदवून शंभर टक्के उद्दिष्ट पूर्ण करावे, असे निर्देश दिले.
यावेळी मेहकर नगरपरिषदेचे जे. आय. तापसे साहेब देखील उपस्थित होते. त्यांनीही सर्व बीएलओंना मोहिमेचे काम जलद गतीने पूर्ण करण्याचे आवाहन करत प्रत्येक नागरिकापर्यंत पोहोचून गणना पत्रके वितरित करण्याच्या सूचना दिल्या.
अधिकाऱ्यांच्या या अचानक धावत्या भेटीमुळे गावातील नागरिकांमध्ये उत्सुकता निर्माण झाली. यावेळी काही नागरिकांनी गावातील विविध समस्यांसंदर्भात अधिकाऱ्यांकडे तक्रारी व सूचना मांडल्या.
या प्रसंगी गावचे तंटामुक्ती अध्यक्ष खंडूभाऊ सदार, सामाजिक कार्यकर्ते रसूलभाई तसेच संबंधित शिक्षक, बीएलओ आणि ग्रामस्थ उपस्थित होते.
