मंडणगड | प्रतिनिधी
रायगड-रत्नागिरी लोकसभा मतदारसंघाचे खासदार सुनील तटकरे यांच्या वाढदिवसानिमित्त मंडणगड येथे विद्यार्थ्यांसाठी शैक्षणिक साहित्य वाटपाचा प्रेरणादायी सामाजिक उपक्रम राबविण्यात आला. राष्ट्रवादी युवक काँग्रेसचे मंडणगड शहराध्यक्ष साईराज सावंत यांच्या पुढाकाराने आयोजित या उपक्रमाला विद्यार्थी, पालक आणि नागरिकांचा उत्स्फूर्त प्रतिसाद लाभला.
मंडणगड येथील जिल्हा परिषद मराठी शाळा, गांधी चौक येथे झालेल्या कार्यक्रमात विद्यार्थ्यांना वह्या, पेन तसेच अन्य शैक्षणिक साहित्याचे वितरण करण्यात आले. विद्यार्थ्यांच्या शिक्षणाला प्रोत्साहन देणे आणि सामाजिक बांधिलकी जपणे हा या उपक्रमामागील प्रमुख उद्देश असल्याचे आयोजकांनी सांगितले.
या कार्यक्रमाला राष्ट्रवादी काँग्रेस पक्षाचे मंडणगड तालुकाध्यक्ष मुजफ्फर भाई मुकादम, माजी नगरसेवक दिनेश शेठ लेंडे, माजी पंचायत समिती सदस्य भाई पोस्टुरे, स्थानिक ग्रामस्थ सुधीर हातमकर, व्यापारी गणेश सावर्डेकर, पालक समितीचे सदस्य, शिक्षक, शिक्षकेतर कर्मचारी तसेच ग्रामस्थ मोठ्या संख्येने उपस्थित होते.
खासदार सुनील तटकरे यांच्या वाढदिवसानिमित्त विद्यार्थ्यांच्या हिताचा हा सामाजिक उपक्रम राबविल्याबद्दल उपस्थितांनी समाधान व्यक्त केले. तसेच खासदारांना वाढदिवसाच्या शुभेच्छा देत हा उपक्रम यशस्वीपणे पार पाडल्याबद्दल साईराज सावंत आणि त्यांच्या सहकाऱ्यांचे अभिनंदन करण्यात आले.
शिक्षणाला प्रोत्साहन देणारे आणि सामाजिक उत्तरदायित्वाची जाणीव करून देणारे असे उपक्रम समाजात सकारात्मक संदेश देणारे ठरत असल्याची भावना यावेळी उपस्थितांनी व्यक्त केली.
