दापोली | प्रतिनिधी
दापोली तालुक्यात सुरू असलेल्या अवैध मटका व्यवसायाविरोधात दापोली पोलिसांनी आणखी एक प्रभावी कारवाई करत एका व्यक्तीला ताब्यात घेतले आहे. हर्णे-वाकडी भेंड येथील एस.टी. पिकअप शेडच्या मागील बाजूस सुरू असलेल्या ‘कल्याण मटका’च्या अड्ड्यावर छापा टाकून पोलिसांनी रोख रक्कम व जुगारासाठी वापरण्यात येणारे साहित्य जप्त केले.
पोलिसांना मिळालेल्या गोपनीय माहितीच्या आधारे मंगळवार (दि. ७ जुलै २०२६) रोजी सायंकाळी ही कारवाई करण्यात आली. कारवाईदरम्यान सिकंदर सत्तार महाडीक (वय ४५, रा. हर्णे बाजार मोहल्ला) हा अवैध मटका व्यवसाय चालवत असल्याचे निष्पन्न झाले. त्यानंतर पोलिसांनी त्याला ताब्यात घेत त्याच्याकडील रोख रक्कम तसेच मटका व्यवसायाशी संबंधित साहित्य जप्त केले.
या प्रकरणी पोलीस कॉन्स्टेबल दिलीप बाळकृष्ण नवाले यांच्या फिर्यादीवरून दापोली पोलीस ठाण्यात गुन्हा क्रमांक १३४/२०२६ नोंद करण्यात आला आहे. आरोपीविरुद्ध महाराष्ट्र जुगार प्रतिबंधक अधिनियमाच्या कलम १२(अ) अंतर्गत गुन्हा दाखल करण्यात आला असून पुढील तपास दापोली पोलीस करत आहेत.
दापोली परिसरातील अवैध जुगार व्यवसायावर आळा घालण्यासाठी अशा प्रकारच्या धडक कारवाया पुढेही सातत्याने सुरू राहतील, असा इशारा पोलीस सूत्रांनी दिला आहे.
