वन विभागाच्या कारवाईची ग्रामस्थांची मागणी; बिबट्याला जेरबंद करण्यासाठी पिंजरा लावण्याची मागणी
सातारा : सातारा तालुक्यातील पुनर्वसित न्हाळेवाडी गावात बिबट्याच्या हल्ल्यात दोन वर्षांच्या चिमुकल्याचा मृत्यू झाल्याची धक्कादायक घटना घडली. जय संदीप खंडागळे (वय २) असे मृत बालकाचे नाव आहे. या घटनेने परिसरात हळहळ व्यक्त होत असून ग्रामस्थांमध्ये वन विभागाविरोधात संतापाचे वातावरण आहे.
शनिवारी सायंकाळी साडेसातच्या सुमारास न्हाळेवाडीतील बौद्ध वस्तीच्या पाठीमागील ओढ्याजवळ ही घटना घडली. त्यावेळी गावातील वीजपुरवठा खंडित झाला होता. अंधाराचा फायदा घेत दबा धरून बसलेल्या बिबट्याने जय याच्यावर झडप घालून त्याला ओढ्याच्या दिशेने नेले.
घटना लक्षात येताच गावातील तरुणांनी तातडीने शोध सुरू केला. ओढ्याजवळ बिबट्या चिमुकल्याला घेऊन असल्याचे दिसताच तरुणांनी आरडाओरड करून त्याला पळवून लावले. जखमी जयला उपचारासाठी रुग्णालयात दाखल करण्यात आले; मात्र उपचारादरम्यान त्याचा मृत्यू झाला.
गावालगत बिबट्यांचा वावर वाढला असून वन विभागाकडून पुरेशी उपाययोजना होत नसल्याचा आरोप ग्रामस्थांनी केला आहे. तसेच वारंवार वीजपुरवठा खंडित होत असल्याने रात्रीच्या वेळी वन्यप्राण्यांचा धोका वाढत असल्याचे सांगत महावितरणविरोधातही ग्रामस्थांनी नाराजी व्यक्त केली.
दरम्यान, वन विभागाने घटनेची तातडीने दखल घेऊन परिसरात पिंजरा लावावा आणि बिबट्याचा बंदोबस्त करावा, अशी मागणी ग्रामस्थांनी केली आहे. मागणीकडे दुर्लक्ष झाल्यास तीव्र आंदोलन करण्याचा इशाराही ग्रामस्थांनी दिला आहे.
