महावितरणकडून दुरुस्तीचे काम हाती घेणार; सोमवारी दुपारपर्यंत वीजपुरवठा सुरळीत होण्याची शक्यता
लोणी काळभोर : येथील खुटवड डीपी खांबावरील मुख्य वीजतार अचानक तुटल्याने परिसरातील वीजपुरवठा खंडित झाला. घटनेची माहिती मिळताच वायरमनने घटनास्थळी धाव घेत सुरक्षिततेच्या दृष्टीने वीजपुरवठा बंद केला.
वीजतार तुटल्यामुळे परिसरातील नागरिकांना अंधाराचा सामना करावा लागत आहे. महावितरणच्या कर्मचाऱ्यांकडून सोमवारी दुरुस्तीचे काम हाती घेण्यात येणार असून, दुपारी १२ वाजेपर्यंत वीजपुरवठा पूर्ववत होण्याची शक्यता असल्याची माहिती देण्यात आली.
दरम्यान, दुरुस्तीचे काम सुरू असताना नागरिकांनी महावितरण कर्मचाऱ्यांना सहकार्य करावे, असे आवाहन करण्यात आले आहे.
