वैद्यकीय अधीक्षकांकडे तक्रार दाखल; आठ दिवसांत सुविधा सुरू करण्याचे आश्वासन — अन्यथा तीव्र आंदोलनाचा इशारा
धाराशिव जिल्हा प्रतिनिधी लाडलेसाब नादाफ मुरूम येथील ग्रामीण रुग्णालयात महालॅबच्या माध्यमातून करण्यात येणाऱ्या विविध प्रयोगशाळा चाचण्या बंद असल्यामुळे रुग्णांची मोठी गैरसोय होत आहे. आवश्यक रक्त तपासण्या व इतर प्रयोगशाळा चाचण्या उपलब्ध नसल्याने नागरिकांना उपचारासाठी तसेच तपासण्यांसाठी खासगी रुग्णालयांकडे व प्रयोगशाळांकडे जाण्याची वेळ येत आहे. या गंभीर प्रश्नाची दखल घेत मुरूम शहर काँग्रेसच्या वतीने ग्रामीण रुग्णालय प्रशासनाकडे तक्रार दाखल करण्यात आली.
यावेळी ग्रामीण रुग्णालयाचे वैद्यकीय अधीक्षक महेश अर्दाळे यांच्याकडे बंद असलेल्या प्रयोगशाळा चाचण्या तातडीने सुरू करण्याबाबत सविस्तर तक्रार देण्यात आली. रुग्णालयात CBC, KFT, LFT, Lipid Profile, Hepatitis Antigen, ASLO, HCV यांसह विविध आवश्यक चाचण्या बंद असल्याने रुग्णांना मोठ्या अडचणींचा सामना करावा लागत असल्याचे काँग्रेसच्या पदाधिकाऱ्यांनी निदर्शनास आणून दिले.
प्रयोगशाळा चाचण्या वेळेवर उपलब्ध न झाल्यामुळे रुग्णांचे रोगनिदान व पुढील उपचार प्रक्रियेला अडथळा निर्माण होऊ शकतो. विशेषतः ग्रामीण व सर्वसामान्य नागरिकांना खासगी रुग्णालयांमध्ये किंवा प्रयोगशाळांमध्ये अतिरिक्त आर्थिक खर्च करावा लागत असल्याने हा प्रश्न तातडीने सोडविण्याची मागणी करण्यात आली.
तक्रार प्राप्त होताच वैद्यकीय अधीक्षक महेश अर्दाळे यांनी तात्काळ वरिष्ठ अधिकाऱ्यांशी संपर्क साधून या प्रश्नाबाबत माहिती दिली. संबंधित वरिष्ठांकडून येत्या आठ दिवसांच्या कालावधीत आवश्यक प्रयोगशाळा चाचण्यांची सुविधा उपलब्ध करून देण्यात येईल, असे आश्वासन देण्यात आल्याची माहिती यावेळी देण्यात आली.
दरम्यान, काँग्रेसच्या पदाधिकाऱ्यांनी प्रशासनाला स्पष्टपणे सांगितले की, आठ दिवसांच्या दिलेल्या कालावधीत ग्रामीण रुग्णालयातील बंद असलेल्या प्रयोगशाळा चाचण्या प्रत्यक्षात सुरू झाल्या नाहीत, तर नागरिकांच्या आरोग्याच्या प्रश्नासाठी काँग्रेस पक्षाच्या वतीने तीव्र आंदोलन करण्यात येईल.
सर्वसामान्य नागरिकांना त्यांच्या परिसरातील शासकीय रुग्णालयातच आवश्यक आरोग्य तपासण्या उपलब्ध होणे गरजेचे आहे. ग्रामीण भागातील रुग्णांना आर्थिक भुर्दंड सहन करावा लागू नये आणि उपचारासाठी आवश्यक तपासण्यांची सुविधा वेळेत मिळावी, यासाठी काँग्रेस पक्ष हा प्रश्न पुढेही प्रशासनाकडे लावून धरणार असल्याचे यावेळी सांगण्यात आले.
या वेळी भारतीय राष्ट्रीय काँग्रेसचे युवा नेते सिध्दलिंग अप्पा हिरेमठ, संतोष जी येवले सर, राजकुमार जी हिरेमठ, बाबुराव जी बेगमपुरे, सुरेश जी गायकवाड, दिपक जी मुळे, सुनील जी चव्हाण यांच्यासह काँग्रेसचे पदाधिकारी, कार्यकर्ते व नागरिक उपस्थित होते.
आठ दिवसांत सुविधा सुरू करण्याचे आश्वासन मिळाल्याने आता प्रशासनाच्या कार्यवाहीकडे नागरिकांचे लक्ष लागले असून, दिलेल्या मुदतीत चाचण्या सुरू न झाल्यास पुढील आंदोलनाची दिशा काँग्रेसकडून निश्चित करण्यात येणार आहे.
